Alaska nunami eqqissisimatitami uuliasiortitsinialersaartoq
Arctic National Wildlife Refugemi nunaminertaq uuliasiorfiusinnaasussatut piukkunneqartoq 6000 kvadratkilometerit missaannik annertussuseqarpoq, uuliasiorfiusinnaannginnissaali præsidentiusimasup Barack Obamap sukataarutigisimavaa.
Arctic National Wildlife Refugep sineriaata nalaani nunamik sajuppillatsitsinikkut uuliasiortoqarnissaa kissaatigineqarpoq, assigiinngitsutigulli aningaasalersorneqartariaqassalluni.
Misissuinissammi Alaskap tamakkiisumik nammineq aningaasalersorsinnaanngilai, namminersortuniillu aningaasalersueqataasussanik ujarlertoqartariaqassalluni.
Alaskami ukiut sisamat matuma siornatigut guvernørip Sean Parnellip, republikaneriusup, Obamap naalakkersuisoqataalu taamanikkut apeqquteqaateqarfigai ANWR-imi uuliasiornissaq pillugu misissuisoqarsinnaanersoq, Obamalli naalakkersuisoqataasalu taamanikkut itigartitsillutik.