Alapernaarsuut Ejnar Mikkelsen motorimik ajornartorsiuteqarluni talittarfimmiileqqittoq

Umiarsuaq alapernaarsuut Ejnar Mikkelsen (EJMI) motoriminik ajornartorsiuteqaqqilerpoq.

Umiarsuup motoriani pingaarnermi gearianilu ajoquteqarnera pissutigalugu Nuummi umiarsualivimmi juunip 22-anili talinngalerpoq.

Issittumi Sakkutooqarfimmi pigaartut pisortaat, Poul Primdahl paasissutissiivoq.

- Juunip 20-ani motorip pingaarnerup aappaa ingerlajunnaarpoq, tamatumalu kingorna Nuummut talikkiartorpugut, taanna oqarpoq, ilanngullugulu umiarsuaq motorinik marlunnik motoriligaammat nammineerluni talikkiartorsinnaasimanerarpaa.

- Iluarsaallugu aallartippaat, kisianni sillimmatissanik suli utaqqipput, taanna paasissutissiivoq.

Umiarsuaq alapernaarsuut kingullermik Nuummi talittarfimmiittariaqarneranut ajornartorsiutaasoq ajornartorsiutigineqanngitsoq, taassuma erseqqissaatigaa.

Umiarsuit Lauge Koch aamma Ejnar Mikkelsen ukioq manna siusinnerusukkut – februaarip aallaqqaataanit marsip 20-ata tungaanut Nuummi umiarsualivimmiiginnarput.

Sakkutuut umiarsuaat motoriata ikiuutaanni ajornartorsiuteqangaatsiarlutik taamani angalasinnaanngillat.

Taamaammat umiarsuaq alapernaarsuut Hvidbjørnen piffissami tassani atortussanngortinneqarluni Savalimmiuniit nunatsinnukartinneqarsimavoq.

Iluarsinissaanut suli sivisulaassasoq

Umiarsuaq qaqugu aallaqqissinnaassanersoq oqaatigiuminaatsoq, pisortap tullia, Poul Primdahlip nalilerpaa.

- Sillimmatit amigaatigisagut pilersaarut malillugu timmisartukkut sapaatip akunnerata tulliani tikittussaapput. Tamatuma kingorna ikkussornissaanut soorunami piffissamik atuilaassaagut. Taamaammat suli sivisulaassaaq, taanna oqarpoq.

Taassuma SAR-imik upalungaarsimasut suli tamakkiisumik suliaqarsinnaasut erseqqissaatigaa.

Illersornissaqarfiullu alapernaarsuutaata aappaa Lauge Koch ”qujanartumik” suli ingerlalluarsinnaanerarpaa.

- Taamaammat suliassagut suliarisinnaavagut. Kisianni umiarsuit soorunami marluutikkusunnerugaluarpagut. Ejnar Mikkelsenip talinngaannarnerani periarsinnaassuserput annikinnerulaarlerpoq, taanna oqarpoq.

Umiarsuup ajutooqqanerata pissutaa Illersornissamut ministereqarfiup Atortunut Pisiortornermullu Aqutsisoqarfiata misissuleruttorpaa.

Umiarsuit pitsaanerunissaannik piumasaqaat

Ejnar Mikkelsen ukioq manna arlaleriarluni pignaarnertut allaaserineqarpoq – pitsaanerpaanngitsumilli maluginiarneqarsinnaavoq.

Umiarsuit Ejnar Mikkelsen aamma Knud Rasmussen ukiuni 15-ini seqqorsinnaanngitsut, DR-ip januaarimi saqqummiuppaa. Umiarsuarnimi qamutilinnut aqutsissuteqannginnera pissutigalugu qamutilittartoqarsinnaanngilaq.

Umiarsuit nunatta Savalimmiullu imartaani naalagaaffeqatigiit kisimik oqaasissaqarnerannik malunnartitsinissaa siunertaavoq – minnerunngitsumillu qamutillilli umiarsuit qaaniittut takussutissaannaapput. Silaannarmullu aarlerisaarinermik taamaallaat seqqorsinnaallutik.

Tamanna ”akuersaarneqarsinnaanngilluinnartoq” illersornissamut ministerip, Troels Lund Poulsenip (V) oqaatigaa.

Illersornissamut ministeri Nuummut marsimi tikeraarpoq. Ministerillu tikeraarnerata nalaani Ejnar Mikkelsen Lauge Kochillu tamarmik motoriminnik ajoquteqarlutik angalaqqusaanatik talinngaannarput.

Inatsisartut Nunanut allanut Sillimaniarnermullu ataatsimiititaliaani siulittaasup, Inuit Ataqatigiinnit Mariane Paviasenip umiarsuarnut nutaanut, piffissamut naleqquttunut nunattalu sineriaani isorartuuni alapernaarsuisinnaasunut aamma - pisariaqassappat sakkutunik qamutilinnillu atuinikkut illersuisinnaasunut aningaasaliisoqarnissaa piumasaqaatigaa.

Troels Lund Poulsenilu umiarsuarnut nutaanut aningaasanik neriorsuivoq:

- Tamanna illersornissaqarfimmut nutaanik aningaasaliisussanngorutta oqaluuserissavarput, Troels Lund Poulsen KNR-imut marsimi oqarpoq.