Akuersinermut inatsisip atuutilerneranit eqqartuunneqartoq siulleq
Angut 36-nik ukiulik 2024-mi januaarimi kinguaassiuutitigut atornerluisimasutut Nunatta Eqqartuussisuuneqarfianit qaammatini arfinilinni piumasaqaatitaqanngitsumik pineqaatissinneqarsimasunut inissiisarfimmiittussanngortinneqarpoq.
Eqqartuussivimmi suliaq eqqartuussisuuneqarfimmit septembarimi suliarineqarmat kinguaassiuutitigut atornerluisimasutut eqqartuunneqarpoq. Eqqartuussisoqarfik Sermersooq arnamit atoqatigiinnissamut akuersissuteqartoqarsimanngitsoq isumaqarpoq, taamaammat angut eqqartuunneqarpoq.
Angutip eqqartuussut ingerlaannartumik suliarineqaqqitassanngortippaa, taannali Nunatta Eqqartuussisuuneqarfianit maanna eqqartuunneqarpoq, Nunatta Eqqartuussisuuneqarfianimi eqqartuussisunit pingasunit marluk akuersissuteqartoqarsimanngitsoq aamma isumaqarput.
Kalaallit Nunaanni Politiit tallimanngornermi ualikkut tusagassiuutinut nalunaarummi allapput.
Akuersissuteqartoqarsimanngippat kinguaassiuutitigut atornerluinerussasoq
Unnerluussisussaatitaasullu Josefine Minor Christensenip Nunatta Eqqartuussisuuneqarfianit eqqartuussiveqarfimmiillu eqqartuussut naammagisimaarlugu tusagassiuutinut nalunaarummi oqaatigaa.
- Nunatta Eqqartuussisuuneqarfiani angusat sulianilu tassunga tunngasuni pineqaatissiissutip qaffasissusilerneqarallarnera naammagisimaarpakka.
- Taama pinerluuteqarnerit ilungersunarluinnartumik isigineqarnerat eqqartuussummit takussutissalerneqarput, eqqartuussullu kinguaassiuutitigut iliuutsit illuatungeriit tamarmik namminneq piumassuseqarnerannik tunngaveqarnissaannut ersarissumik takussutissiinissaa neriuutigaa, akuersissuteqartoqanngippammi atornerluineq pineqartussaammat, taanna oqarpoq.
Pinngitsaaliilluni atornerluinerit pillugit suliani siusinnerusuni atornerluinermi nakuuserneq imaluunniit nakuusernissamik siorasaaruteqartoqarsimanissaa piumasaqaataasaraluarpoq, sulialli akuersissuteqartoqarsimanersoq tunngavigalugu maanna nalilerneqartalerlutik.
