Akitsuutit uuliasiorneq unikaallatsissinnaavaat
Inuussutissarsiornermut aatsitassanullu naalakkersuisoq Ove Karl Berthelsen isumaqarpoq tamanna piviusunngortinneqassagaluarpat Nunatsinni aatsitassarsiorniarnerit uuliasiorniarnerillu ikileriarujussuassasut aamma ullumikkut ujarlernernit aningaasat isertinneqartartut ikileriarujussuarsinnaasut imaluunniit isertitsissutaajunnaarsinnaasut.
Nunarsuarmi nukissiuutinik atuinermut atatillugu nalilersuinermik suliaqartartut aatsitassarsiorniartunut uuliasiorniartunullu akileraaruteqaataasartut, nunani assigiinngitsuni 17-ini misissuiffigalugit sanilliussimavaat.
Misissuinerup taassuma ersersippaa, Nunarput akileraartitseriaatsimut pineqartumut tunngatillugu akisunerpaap akikinnerpaallu qeqqata missaani inissisimasoq. Kisianni akileraartitsisarnerup qaffasissusaa isiginiarlugu nunanut allanut uuliamik tunisassiarineqarsinnaasumik suli nassaarfiusimanngitsunut sanilliullugu aningaasaqarnerup tungaatigut Nunatsinni piumasaqaataasut sukannernermut ilaapput.
- Aatsitassanik uuliamillu ujaasinernit aningaasartuutaasartunit 10 procentimik akiliuteqartitsinissap ujarlernerit ikileriarujussuarnissaannik kinguneqartitsiinnassaaq, Ove Karl Berthelsen oqarpoq nangillunilu:
- Nunarsuarmioqatitta akornanni unammilleqataavugut, taamaattumik Siumup siunnersuutaatut aatsitassarsiorfiutileqatigiinnut uuliasiortitseqatigiinnullu taama annertutigisumik piumasaqaateqaannarnissaq ajornaqaaq. Aatsitassarsiorfiutileqatigiit uuliasiorfiutileqatigiillu Nunatsinni aningaasalersuinissaat piumaqaarput, imaanngilaq ajattussagivut, Ove Karl Berthelsen naggasiivoq.