Akitsuutinut qaffaanissamik siunnersuut isornarineqaqaaq

Naalakkersuisut sukkunut, neqinut, sukuluunut minnerunngitsumillu uuliamut, solarimut dieselimullu akitsuutinik qaffaanissamik siunnersuutaat Siumumi politikkerinit arlalinnit isornartorsiorneqangaatsiarpoq.
septembarip 14-at 2015 13:47

Inatsisartunut ilaasortaq Ineqi Kielsen siumumeersoq, SIK-milu siulittaasup Jess G. Berthelseip sapaatip akunnera kingulleq akitsuutinik qaffaanikkut inuiaqatigiit kaasarfianit aallernissaq sakkortuumik isornartorsiorpaat.

Aamma atuaruk SIK-p siulittaasua: - Akitsuutinik qaffaaneq sulisartunut eqquinerlussaaq

Themothæus Petersen Siumumit Qaasuitsup kommuniani nunaqarfimmi aqutsisunut ilaasortaq, Naalakkersuisut ikummatissanik qaffaaniarlutik siunnersuutaat amiilaarnarnerarpaa.

- Qineqqusaarneq kingulleq qiviaraanni, isorliunerusuni najugaqartugut atungarisakkut ikummatissanut kallerup inneranullu tunngasut akikillisaavigineqarnissaat annertuumik naalakkersuisuutitaqartut nilliaatigivaat, Themothæus Petersen oqarpoq nangipporlu:

- Killormorluinnaq massakkut Naalakkersuisut siunnersuuteqarput. Aningaasanut inatsisissamut anguniagassatik killormoortillugit isorliunerusuni najugallit aallerfigilerpaat, Themothæus Petersen oqarpoq.

"Siumup politikkerinngilaa"

Siumumi politikkikkut oqaaseqartartuugallartoq Jess Svane-p siunnersuutigineqartoq aamma isorivaa.

- Tunngaviusumik Siumup politikkerinngilaa inuit kaasarfiiniit toqqaannartumik aalleqattaarneq akitsuusersuinikkut, Siumumit politikkikkut oqaaseqartartoq Jess Svane oqarpoq.

Aamma atuaruk Akitsuutit qaffanneqartariaqanngillat

Jess Svanip Nukissiorfiit ukiumoortumik nunatta karsianit attartortagai milliuniilikkaat eqqaavai. Taassuma siunnersuutigaa, Nukissiorfiit nunatta karsianit attartukkani utertillugit, aningaaserivinnit nammineerluni attartorniassasoq.

- Nukissiorfiiit nunatta karsianut attartortarput ingerlatsinerminnut. Taakkulu erniakkaamik arriittuararsuarmik nunatta karsianut utertinniarneqartarput aammalu takusinnaasakka ilisimasakkalu malillugit tamakkiisumik ingerlaannaq utertinneqarneq ajorput, Jess Svane oqarpoq.

Themothæus Petersenip akitsuutit qaffannissaat akerlerinngikkaluarpaa. Ikummatissanulli akitsuutit qaffanniarneqarneri avannaani issittumi najugaqartunut eqquinerluttappaallassasut, Kullorsuarmiu isumaqarpoq.

Tassalu inuulluarniutinut akitsuutit qaffanneqarnissaat siunnersuutigaa:

- Ikummatissanut tunngasut taavalu aamma kallerup inneranut tunngasut taakkua matussutigisinnaasaattut isigivakka imigassamik akitsuusersuinikkut. Ukua nammineq ajunngereerput inuulluarniutinut tunngasut soorlu tupa, mamakujuttut allallu, Kullorsuarmit nunaqarfinni aqutsisuni ilaasortaq Siumumeersoq Themothæus Petersen taama oqarpoq.

Aamma atuaruk Anda sakkortuunik aalajangiisarniarpoq