Akiligassallit pingasut ilimagisinnaavaat akiligassitseqqinnissaq
![](/sites/default/files/styles/image_934x467/public/article_images/deloitte.jpg?itok=EsLoodh4)
- Tassa uani nalunaarusiami takusinnaaneqartutuut, angalasoqarsimavoq hotelinilu unnuisoqarluni namminersorlutik oqartussat susassarinngisaannik, tassa namminneq angalanertut isikkoqartut. Ingerlatsinermullu aningaasartutitut ilanngunneqarsimaneri kukkuluttornertut isikkoqarput, taamatulli nalilertariaqarlutik, Jens Erik Kirkegaard Kukkunersiunermut ataatsimiitsitaliami siumumit ilaasortaq taama oqarpoq.
Nalunaarusiami allassimavoq, nammineq aningaasartuutissat ingerlatsinermut ilanngunneqarsimasunik akiligassallit ersersinneqartut pingasuusut. Tassa Kuupik Kleist, 2009-miit 2013-mut naalakkersuisut siulitaasorisimasaat, 10.000 koruunit sinnerlugit akiligassaqartoq, Aleqa Hammond 2013-mi 2014-milu naalakkersuisut siulittaasorisimasaat, 14.145 koruuninik akiligassaqartoq Anthon Frederiksenilu 2009-miit 2013-mut naalakkersuisunut ilaasortaasimasoq, 40.000 koruunit sinnerlugit akiligassaqarsimasoq.
Tamanna kukkunersiuinermik ataatsimiitsitaliap misissuisitsinerup inernerannik paasissutissanik saqqummiussiffigineqarmata erserpoq.
Agathe Fontainilli IA-meersup decembarip 31-ni saqqummiussaa maanna Kukkunersiuinermik ataatsimiitsitaliami ilaasortaqataata Jens Erik Kirkegaardip uppernarsarpaa:
- Tassa imatut paasivarput akiligassanik ingerlatitseqqittoqarsimanngittoq uku pineqartut pillugit. Allaffissornerminngaanniit akiligassat ukununnga pineqartunut ingerlateqqinneqarsimanngillat, kisiannili allaffissornermut aningaasartuutitut ilanngunneqaannarsimallutik. Taamaammat taakku pineqartut akiligassanik nassitseqqissinnaanissartik ilimagisinnaavaat, Jens Erik Kirkegaard taama oqarpoq.
Naalakkersuisut tusaqqaarlugit
Kukkunersiuinermillu ilasortap naqissuserpaa, isumaliutissiissutip suliarineqannginnerani Naalakkersuisut oqaaseqaataat januaarip 16-nni nassiunneqartussatut neriorsuutaareersoq utaqqineqartariaqartoq. Nalunaarusiarli kukkunersiuinermik ataatsimiitsitaliamit Naalakkersuisunut nassiunneqareerpoq.
- Imaassinnaagami akiligassat ilai uani pineqartut nassiunneqareersimasut akilerneqareersimasullu. Taamaammat Naalakkersuisut tusaqqaartariaqarpagut isumaliutissiissummik saqqummiussinnginnitsinni, Jens Erik Kirkegaard taama oqarpoq.
Naalakkersuisut siulittaasoqarfiannut paasiniarparput, sooq naalakkersuisoqarfinniit nammineq akiligassat suli akiligassartai Naalakkersuisuusimasunut nassiunneqarnikuunnginnersut. Mininguaq Kleistilu Naalakkersuisut siulittaasoqarfiani pisortap oqaatigaa Naalakkersuisut akissuteqaammini ilaatissammagu tamanna oqaaseqarfigisinnaanagu. Paasissutissiissutigaalu maanna paasissutissat saqqummersut pillugit naalakkersuisoqarfinnut tusarniaasoqaleruttortoq.