Akileraarutinik utertoorutissaqarpit imaluunniit akiliinikippallaarsimavit?
Akileraartarnermut Aqutsisoqarfimmit akileraarutinik utertoorutissaqartut inuit 32.000-ngajaat iluatsitsisut ilagivaatsit imaluunniit allat 8.000-ngajaat assigalugit akiliinikippallaarsimallutit akiliissavit?
Apeqqummut tassunga akissut e-boksinniippoq, tassuuna inaarummik naatsorsuutit pissarsiarissavat. Tassani ukiumut akileraarfiusumi kingullermi akileraarutigisimasatit takusinnaavatit.
Ukiumut akileraarfiusumi akiliivallaarutit katillugit 292,4 millionit koruunit Akileraartarnermut Aqutsisoqarfiup innuttaasunut 32.997-inut agguaatissavai. Akileraarutissallu sinneri 138,5 millionit koruunit akileraartartunut akileraarnikippallaarsimasunut 8.132 -inut akiligassiissutigineqassapput.
Akileraarutinik akiliivallaarsimalluni utertoorutissat ingerlaannaq ikineqassasut
Akileraarutinnut inaarummik naatsorsuutivit takutippagu iluatsitsisut ilaattut akiliivallaarsimallutit utertuussasutit, Nem-kontoqaruit aggustip 30-iani 31-ianiluunniit utertoorutissatit ingerlaannaq ikineqassapput.
Nem-kontoqanngikkuit pitaarnissamut ulloq killigititaq ukioq manna aggustip 12-aavoq, akileraarpallaarutivillu tunniunneqarnissaat utaqqisikkallarneqassapput, Aningaasaqarnermut Naalakkersuisoqarfik akileraarutinik akiliivallaarsimasunut utertitsinissaq pillugu tusagassiorfinnut nalunaarumminni taama allapput.
Nem-kontotaareeruit nammineerlutit Akileraartarnermut Aqutsisoqarfimmut nalunaarutigissavat, tamatumalu kingorna akileraarpallaarutitit Nem-kontunnut ikineqarumaarput.
300 millionit koruuningajaat akiliivallaarsimasunut agguaanneqarnissaat naak qilanaarutigineqarsinnaagaluartoq tamarmik utertoorutigineqassanngillat. 292,4 millionit koruuniniimmi taakkunannga 80 millioningajaat oqartussanut akiitsunut Akileraartarnermut Aqutsisoqarfiup matussutigineqartussanngortippaat.
Oqartussanut akiitsoqareeruit akileraarutinik akiliivallaarsimallutit utertoorutissatit pissarsiareratarsinnaanngilatit.
Akileraarutissat sinneri akileraarutitigut ilanngaatissanut ilanngarneratigut akilerneqarsinnaasut
Akileraarnikippallartut 8.000-ingajaat katillugit 138,5 millionit koruuninik akiligassinneqassasut ilagippatsit assigiiinngitsutigut akiliisinnaavutit.
Novembarip 20-utinnagu akiligassatit akilersinnaavatit taamaasillutillu Akileraartarnermut Aqutsisoqarfiup akileraarutit sinnerinut ernialiussaq 6 procenti sipaassavat. Akileraarutinnulli sinneruttunut akiliutinni ernialiussaq 8 % ilanngunneqassaaq, Akileraartarnermut Aqutsisoqarfik tusagassiorfinnut nalunaarummi taama ilisimatitsivoq.
Akileraarutissavit sinneri 2024-mi akileraarutitigut ilanngaatissavit ilanngarneratigut aamma akilersinneqassapput.
Akileraarutissat sinneri 18.000 koruunit qaangerpagit ilanngakkat naafferaartumik qaammatini pingasuni tullinnguuttuni akilersorneqassapput.
Soraarnerussutisiassat nakkutigikkit
Naggasiutitut minnerunngitsumilli soraarnerussutisiaqalernissamut aaqqissuussinermut peqataasussaatitaaninni akiliutigisimasatit naammannersut nakkutigissavatit.
Soraarnerussutisiaqalernissamut aaqqissuussinermut peqataasussaatitaanermut tunngasut naatsorsuummi akileraartarnermut allakkat ilaattut pissarsiassanni takuneqarsinnaapput, akiliinerillu Akileraartarnermut Aqutsisoqarfimmut uppernarsarnissaa illit nammineq akisussaaffigaat.
