Akileraarut pillugu isumaqatigiittoqanngitsoq
Nunat allat assigalugit IA-kkut siuttuuffigisaannik isertitat naapertorlugit akileraaruseeriaaseqartitsisoqartalerpoq, tamannali naalakkersuisooqataasunit Demokraatinit illuatungiliuttuniillu Siumukkunnit isumaqatiginartinneqanngilaq.
- Akileraartarnermut aaqqissuusseqqinnermi kissaaterput iluatsippoq, soorlu inuiaqatigiit aningaasarsiornikkut tulluussaanikkut isertitaqarnerpaat akileraarnerusalernerisigut tamanna anguneqarpoq. Taamaalilluta inuiaqatigiinni sanngiitsortatta pisariaqartitaat eqqanaarneqarput, Kuupik Kleist oqarpoq.
Aleqa Hammondili ileqimisaartorpoq - inuiaqatigiit pisariaqartitaannut naleqqussaasimaneraaneq politikkikkut eqqanaarinninnerummagimmat.
Aningaasaatit kaasarfimmit allamut nuuttaqattaaraluaraanniluunnit iluaqutaanngilaq, tamannalu nunatsinni pisariaqartinneqanngilaq. Akileraaruseriaaseqarpugut pitsaasumik – tassa isertitaqqortunerit isertitakinnerisunut sanilliullugit akileraarnerusareerput. Isertitaqqortunerit isumaginninnikkut ikiorserneqarneq ajorput - inuiaqatigiinni ikiugassat kisimik ikiorneqartarmata, Aleqa Hammond isumaqarpoq.
Demokraatit isumaqarput, akileraarut isumaginninnermut ikiorsiissutinut sanilliullugit qaffasippallaartoq sulinerullu akilersinnaasunngortinnissaanut aaqqiinissamut sulissuteqarumallutik.
- Maannamut minnerpaamik akissarsiaqarluni sulineq pisartagaqarnerluunniit taamaatsillugit akilersinnaasoqanngilaq soorlu nunami maani pisartagaqartitseriaaseq qaffasippallaaqaaq – sulerusuttummi arlaatigut ajunngitsorsiassaqartariaqarput – taamaattoqartillugu inuit sulerususseqanngitsut ikiliartornavianngillat, aaqqiinikkulli tamanna inuiaqatigiinnut inunnullu sulerisuttunut iluaqutaasussaavoq, Jens B. Frederiksen siunnersuuteqarluni oqarpoq.
