Akileraartarnermut immikkut ilisimasallit aatsitassarsiortut misissorniaarpaat
Innuttaasut akornanni aarleqqutigineqarpoq suliffeqarfissuit nunanit tamalaaneersut sinneqartoorutinik nuussisarnermikkut nunatsinnut akileraarnaversaarnissaat. Tamanna ilaatigut oqaatigineqartarpoq London Miningip Isukasiani suliniutaa pillugu innuttaasunik ataatsimiisitsisarnerni. Politikkerit akornanni aamma qularutigineqarpoq aningaasat koruunit milliardilikkaat ingerlaarnerat Namminersorlutik Oqartussat nakkutigisinnaaneraat.
Siumup inatsisartuni ilaasortaatitai Malik Berthelsen aamma Kim Kielsen taamatut ernumaammernertik paragraf 37 naapertorlugu ersersippaat.
- Aatsitassani ingerlatat amerliartornerat akileraarutinik nakkutiginninnissamik pisariaqartitsinerup annertunerulernissaanik kinguneqassasoq naalakkersuisut eqqumaffigaat, Aatsitassanut naalakkersuisoq Ove Karl Berthelsen akissummini allappoq.
Taamaalilluni nassuerutigaa ullumikkut sulisorineqartut amerlassusaat nunani tamalaaneersut suliffeqarfissuit nakkutiginissaannut naammaqqajanngitsoq.
- Taamaattumik naalakkersuisut aalajangerput nunani tamalaani immikkut ilisimasaqartunik suleqatigiinnik pilersitsiniarlutik. Taakkua tamanna qanoq ingerlanneqarsinnaanersoq siunnersuusiorfigissavaat, Ove Karl Berthelsen allappoq.
Immikkut ilisimasallit suleqatigiit 2013-mi pilersinneqassapput. Taakku ilaatigut misissuataassavaat suliffeqarfissuit akileraarnaversaarnissaannik ullumikkut inatsisit atuuttut unitsitsisinnaanersut.
