Akileraarnikinnerulerlutalu ineqarnermut akiliuteqarnerulissaagut
Aningaasaqarnermut Naalakkersuisup, Maliina Abelsenip innersuussutit pillugit saqqummiussiguni eqqartussavai allannguinerit, ilaat inuiaqatigiinnut oqilisaataasussat ilaalli aningaasaqarnermik aqutsinermi sukaterinerussallutik.
Naalakkersuisut siunnersuutaat ilaat makkuupput; sulinermi akileraarut appartinneqassasoq, isertitat oqartussanit aqunneqalissapput soraarnerussutisiaqarnermullu ukioritinneqartut qaffanneqassapput.
Tassa siunnersuutit ilaannaat tamakkuupput.
Nunatsinni siunissami inuulluataarnerulernissarput aammalu oqinnerusumik aningaasanik aqutsisinnaanissaq eqqarsaatiginerullugit, Akileraartarnermut Atugarissaarnermullu Isumalioqatiissitap innersuussutitik upernassaq martsimi saqqummiupaat. Isumalioqatigiissitaq marloqiusamik innersuussuteqarpoq. Assagut sarliaannarlugit utaqqiinarsinnaavugut imaluunniit siunissami iluaqusiisinnaasunik qanoq iliuuseqarsinnaavugut.
Utaqqiinnarnerup nassatarissavai Nunatta karsiata qanoq aningaasaateqarnera malillugu akileraarutit appartillugillu qaffatsittarnissaat. Qanorli iliuuseqarnerup nassarissallugit inuuniarnermi, ilinniartitaanermi agguaassisarnermilu ajornartorsiutit annikillisarneqarnissaat, siunertaalluni inuit ataasiakkaat amerlanerit imminnut napatinnerulernissaat. Tassalu taakku kingulliit taasneqartut Naalakkersuisut malinniarpaat.
Naalakkersuisut maleruagassaliortuusillutik anguniakkanik arfineq marlunnik siunniussaqarput, tassalu; Meeqqat inuusuttullu, ilinniartitaaneq, sanaartornermut tunngasut, akileraartarneq allallu pingasut.
Naalakkersuisut siunniussaat akileraartarnermut tunngasoq iluatsinneqassappat, allannguineq annertooq pissaaq. Sulinermi akileraarut appartinneqassaaq, tamatumunngalu ilutigitillugu ilanngaatit maanna atuuttut, akissaqarluartunullu atuutsinneqartut peerneqassapput.
Akileraarutip appartinneqarnerata malitsigissavaa, inimut akiliutaasartut qaffannerat. Naalakkersuisut isumaqarput inimut akiliutit akiviusunut naapertuunnerusariaqartut. Naalakkersuisuttaaq siunniuppaat inissiat nammineq pigisat akitsuuserneqartalissasut.
Naalakkersuisut siunniussaat piviusunngussappata, inuttaasut naatsorsuutigisariaqassavaat sulinerminni aningaasarsiat oqartussanit aqunneqalernissaat. Tassami innersuusutigineqarpoq sulinermi aningaasarsiat Kiffaq-kontomik taagukkamut ikineqartalissasut, taamaaliornikkut akileraarutit, inimut akiliutit allallu Kiffaq-kontomiit oqartussanut ingerlateqqinneqartassapput, taamaaliortoqareeraagallu aatsaat aningaasarsiat sinneri inuup nammineq sumut atussanerlugit aalajangersinnaalissavaa. Kiffaq-kontomik eqqarsarnerup siunertaraa inuiaqatigiit oqartussanut akiitsoqalersarnerisa pinaveersaartinneqalernissaa.
Aaqqissuussineq alla tassaassaaq pinngitsaaliissutaasumik soraarnerussutisiaqalernissamut ileqqaagaqartalernissaq. Aamma utoqqaat sulisinnaanerat sivitsorneqassaaq, tassami maanna ilisimaneqalereermat utoqqalisartut ukioqqortusigaluttuinnartut. Naalakkersuisut siunniuppaat utoqqaat inissiassaannik ilinniartullu inaannik amerlanernik sanaartornissaq.
Inunnik isumaginninnermut aningaasartuutit appartinneqarnissaat Naalakkersuisut siunniuppaat. Oqartussanit ikiorneqarnissamik utaqqiinnarpallaartarneq maanna atuukkunnaarsinniarneqarpoq. Siusinaartumik soraarnerussutisiaqartartut eqqarsaatigalugit taakku sapinngisamik sivisunerusumik suliffeqarsinnaaneri siunniunneqarpoq atornerluisuugaannili siusinaartumik suliunnaarnersiuteqalerani katsorsartittoqartarnissaa Naalakkersuisut siunniuppaattaaq.
