Aki-Matilda siulittaasunngorniarpoq: Folketingip qimannissaanut piareersimasoq
Folketingimi ilaasortap, Aki-Matilda Høegh-Damip siulittaasunngorniarniarnini Facebokkikkut sapaatiummat nalunaarutigimmagu Siumumi siulittaasunngorniartoqarnissaa pissannganarnerulerpoq.
Partiilli immikkoortortaqarfiisa kiap siulittaasunngorniarsinnaanissaa aalajangertussaavaat. Tamanna Siumumi ileqqoreqqusani allassimavoq.
Siulittaasunngorniarnermini naalakkersuisut siulittaasorisimasaat, Kim Kielsen (S) Siumumi siulittaasunngorniartoq unammillerpaa. Kim Kielsen Siumumi 2014-imit 2020-mut aamma siulittaasuuvoq.
Partiip maanna siulittaasuata, Erik Jensenip immikkoortortaqarfiit tapersiissappata siulittaasunngorniaqqinnissaminut aamma piareersimalluni Sermitsiamut oqaatigaa.
Politikkimut peqataasoqarnerulissasoq
KNR-ip siulittaasussatut sassarniartoq, Aki-Matilda Høegh-Dam ataasinngornermi ullaap tungaani oqaloqatigigamiuk taassuma sooq sassarniarnerluni ilisimaarivaa. Piniartoq, nunalerisoq angerlarsimaffeqanngitsorlu Siumumup politikkiata ilaaniissapput.
- Siulittaasunngussaguma pingaarnertut aamma alloriassutigisariaqarpagut Siumup politikkia erseqqinnerusumik ingerlallugit, ilaatigut erseqqinnerusumik aamma ingerlattariaqarpagut pingasoqiusanngussagutsigit siullertut inuussutissarsiornitsinnut aamma politikkerput ersarinnerusoq, tassaasinnaavoq soorlu aalisarnermut tunngagaluarpat, aatsitassarsiornermut tunngagaluarpat imaluunniit aamma allatut naggorissaanikkut tunngagaluarpalluunniit, folketingimut ilaasortaq oqarpoq, nangillunilu:
- Politikkerput erseqqippallaannginnami. Akunnitsinni eqqartortaraluarparput. Kisianni avammut saqqummertarnera naammaginannginnami.
Innuttaasut politikkimut ilusilersueqataaniinnissaat pingaartillugu Aki-Matilda Høegh-Damip oqaatigaa.
- Eqqartornerusariaqarparput erseqqissumik nalunaarluta aajuna Siumup politikkia. Massakkut suliniuteqartoqartaraluarpoq, kisianni innuttaasut peqataanngippata, innuttaasut malinnaanngippata, Siumoqatittaluunniit nalugunikku susoqarnersoq taava kikkunukua sullikkigut.
KNR-ip Aki-Matilda Høegh-Dam Kim Kielsenimit maannalu siulittaasumit Erik Jensenimit qanoq allaanerusumik iliuuseqarsinnaasoq aperaa.
- Qanorluunniiit unammitigigaluaraangatta Siumumi unammineq peqqinnartutut isigisarparput. Taakkunani unamminerni qanorluunniit kinguneqaraluarpat tamaavitta inissaqartinneqartuaannarumaarpugut. Pissutigalugu tamaavitta Erik Kimmi pikkoriffinnik aamma ulikkaarput, taanna erseqqissaavoq.
Aki-Matilda Høegh-Damillu siulittaasutut tulluartuunini qularutiginngilaa:
- Ukiut aqqaneq-marluk Siumumi ilaasortaavunga, Siumup inuusuttaaniittarnikuullunga, Siumup siulersuisuuneraniittarnikuullunga. Taavalu taassuma saniatigut politikkikkut massakkut ukiuni sisamani misilittagaqarluarlunga siulittaasuusarlunga Kalaallit Nunaat pillugu ataatsimiititaliami, taanna nassuiaavoq.
Folketinget qimassavaa?
Aki-Matilda Høegh-Dam juulip 28-ani 29-ani 30-anilu ataatsimeersuartoqarnerani siulittaasunngussaguni partiimi kissaatigiguniuk folketingimit tunuarnissani piareersimaffigalugu nammineq oqaatigaa.
Taannalu tunuassappat palasi, Markus E. Olsen (S) folketingimiilernissaminut piareersimavoq.
Markus E. Olsen siorna juunip 21-ani inuiattut ullorsiornermi uissuumminartumik qilaatersornertalimmik naalagiartitsereerlunilu novembarimi Nuummi palasiujunnaarmat tusagassiorfitsigut ukkatarineqangaatsiarnikuuvoq.
- Akip suliai nangeqqissinnaavakka, uangalu aamma nammineq nunarput pillugu takorluukkakka folketingimilu takorluukkakka apuukkiartornissaanut piareersimavunga, taanna KNR-imut oqarpoq.
Aki-Matilda Høegh-Dam nunatta qaqugu namminiilivinnissaq qaqugumut ullulersinnaaneraa Berlingskemit maajimi aperineqarami aalassatsitseqaaq:
- Eqqarsarpunga immaqa ukiut arfineq-marluk ingerlaneranni. Naalagaaffinngorsimassaaq. Ukiunit arfineq-marlunnit qulinut ilimaginerpaavara.
Tamanna taassuma 2030-mut pilersaarutigineraa tusagassiortumit aperineqarami 2030-p missaani nunatta naalgaaffinngorsimanissaa ilimagalugu uppernarsarpaa.
Markus E. Olsenillu folkentingimiilersinnaasup nunatta qaqugu Danmarkimut atajunnaarnissaanut ulluliinissaq aamma qunuginngilaa:
- Periarfissaappat, 2029-utinnagu pissaaq. Kingusinnerpaamik.
