Akerliusut Trumpimit ikioqqusut
Akerliusut tusindillit sapaatit akunneri arlallit akerlioreerlutik amerikamiut præsidentiannut, Donald Trumpimut saaffiginnipput.
"Præsident Trump Hongkong aniguisiguk" ilaatigut allagartarsuit taama allaqqasut, nutaarsiassaqartitsivik CNN allaaserisaqarpoq.
Akerliusummi kissaatigaat, USA-p ikiuunneratigut innuttaasut tamat oqartussaaqataanerannut akiuisoqassasoq - Kinalu illoqarfimmi sunniutikinnerulissasoq.
Akerliusullu amerlaqisut sinniisoqarfiup eqqaani ikioqqullutik suaartartut amerikamiut erfalusuannik nittarsaassillutik ikioqqupput.
Akerliuneq aallartippoq Kinami pinerlussimasutut pasisat eqqartuussivitsigut tunniunneqarlutik malersugaasinnaalernissaat pillugu inatsissatut siunnersuut saqqummiunneqaqqaarmat. Inatsilli taamaatiinnarneqarmat Kinap Hongkongimi sunniuteqarnerujartuinnarnera akerliuffigineqalerpoq.