Frankrig: Akerliussutsimik takutitsisut ikileriarput
Parisimi ullaap tungaani akerliussutsimik takutitsisoqaqqippoq. Præsidentip Emmanuel Macronip tunuarnissaa piumasaralugu akerliussutsimik takutitsinerit tallimassarivaat.
Ullumi arfininngornermi akerliussutsimik takutitsisut amerlassusaat akerliussutsimik takutitsinerup siulianut sanilliullugu affaannanngorsimapput.
Tassami inuit ullumi arfininngornermi akerliussutsimik takutitsisut 33.500-jut missaanniissimapput. Frankrigimi nunamut namminermut ministereqarfik taama nalunaaruteqarpoq. Akerliussutsimik arfininngormat siuliani takutitsisut 77.000-it missaanniipput.
AAMMA ATUARUK Frankrigemi eqqissiviilliortoqarmat 400-it ikiligaapput
Præsidentip ministeriisalu akerliussutsimik takutitsisut qinnuigaat akerliussutsimik takutitsiunnaaqqullugit taamaalillutik suliatik eqqissillutik nangeqqinniassammatigik.
- Isumaqanngilanga tamat oqartussaaqataaneranut naleqqutinngitsoq. Nunarput eqqissisimasuusariaqarpoq, tamanna pisariaqarluinnarpoq. Nunap ingerlaasitoqqani uterfigeqqittariaqarpaa, Macron tallimanngormat taama oqarpoq.
Taassumalu unnersuussutigaa akitsuutinik nutaanik eqqussiniarnertik, Frankrigimi naalakkersuisut aappaagumut aningaasanut inatsisissami ilaatinnianngikkitsik. Unnersuussutip siunertaraa akerliussutsimik takutitsisut piumasaasa ilaat akuersissutiginiarneqarnerat.
Tamannalu iluatsiffeqarsimasoq, akerliussutsimik takutitsisut ikileriarsimaneratigut erserpoq.
Akerliussutsimik takutitsisut "De gule veste" aalajagersimasumik siulittaasoqanngillat, taamaammat franskit naalakkersuisuisa akerliussutsimik takutitsisut isumaqatiginiarneri ajornakusoortippaat.