Politiit ullormut nalunaarutaat: Akerliussutsimik takutitsinissanut sillimavugut
![](/sites/default/files/styles/image_934x467/public/article_images/7v9a3669.jpg?itok=Qy14A9Xn)
Kalaallit Nunaanni Politiit ulloq unnuarlu kingulliit ulapputeqanngillat, ullumili ulapaarnissaminnut piareerput. KNAPK-mi ilaatigut orsussap apriilip aallartinnerani akitsornera, aalisarnermut inatsisissaq oqallisaaqisoq nipisallu suaasa akii pillugit ingerlaaqatigiilluni nuna tamakkerlugu akerliussutsimik ullumi sisamanngornermi takutitsinissamik nalunaarpoq.
- Suliassatsinnut ilaammat sillimavugut, akerliussutsimillu takutitsinissamik nalunaarummi allaqqasut naapertorlugit akerliussutsimik takutitsisussat amerlapput, politiit pigaartuisa ningiuat Anette Ostenfeldt oqarpoq.
Qanorpiaq piareersarnerlutik akerliussutsimillu takutitsisussat qassit missaaniissangatinneritsik, politiit pigaartuisa ningiuata ilisimatitsissutiginngilaa. Maniitsumili, Nanortalimmi Nuummilu akerliussutsimik takutitsisoqassasoq, taanna oqarpoq.
Aallaasilisartoqarlutillu suaartaattut
KNAPK-mi ilaasortat ingerlaaqatigiillutik akerliussutsimik kingullermik takutitsigamik, qinikkanut suaartaatiinnarnatik aamma aallaasilisartortaqarnerarneqarput. Taamaaliortoqarniarneranik politiinut akerliussutsimik taamanikkut takutitsisoqartinnagu ilisimatitsissutigineqarsimanngikkaluartoq sillimasimasut, Sermitsiaq AG ulloq taanna allappoq.
Taamaammat qinikkat akerliussutsimik taamanikkut takutitsisut anillaffiginissaannut nangaaqqaaraluarput, KNAPK-mili ilaasortat tusarnaarniarlugit taamaaliuinnarput.
Akerliussutsimik ullumi takutitsinermi aallaasilisartoqarnissaa ilimagineritsik, Anette Ostenfeldtip oqaatiginngilaa, KNAPK-li pisussaaffini malillugu akerliussutsimik takutitsinissamik akunnerit 24-t sioqqullugit nalunaarpoq.
Tassa Nuummi ullup qeqqaniit aamma Maniitsumi Nanortalimmilu ualeru ataatsimiit ingerlaaqatigiilluni akerliussutsimik takutitsisoqassaaq.