Aka Niviâna Mørch Pedersen isiginnaagassiami nangeqattaartumi iluatsilluartumi inuttaasoq
HBO-mi isiginnaagassiaq nangeqattaartup, True Detectivep immikkoortua nutaaq ippassaq takuteqqaarneqarpoq. Isiginnaagassiaq immikkoortunik nangeqattaartunik sisamanik maanna immikkoortoqarpoq, taannalu Amerikami nunap ilaani misissueqqissaartartut suliassariligassaannik eqqumiitsoqartarneranut toqutsisoqartarneranullu tunngalluni. Ukiumi unnuat takisuupput, issinneralu qerititsivinnit nillernerulluni.
Immikkoortut nangeqattaartut sisamaat illoqarfiusuusartitami inuilaarsummi Ennisimi pisuusaartinneqarpoq. Illoqarfik ikinngutit akerariillu akornannit nunarsuup naggatissaanit taaneqartartoq, isiginnaagassiat pillugit atugassiami Ekkomi isiginnaagassiamik allaatiginnittoq allappoq. Isiginnaagassiarli piviusumik Islandimi immiunneqarpoq.
Jodie Foster angutinik arfineq-pingasunik eqqumiitsumik tammarsimasunik arnat misissueqqissaartut ilagaat.
Kalaallit isiginnaartitsisartut arlallit ilaapput. Aka Niviâna Mørch Pedersen taakku ilagaat. Taassuma arnat misissueqqaartartut aappaata inuuniutigalugu tilluuttartuusimasumit Kali Reisimit inuttaaffigineqartoq qatanngutaa Julia inuttaaffigaa.
Unnuup taarnerpaaffiani immiussat
KNR-ip taanna Hollywoodimi tallimanngormat takutitseqqaartoqarnerata kingorna naapippaa.
- Puigugassaanngilaq, taanna oqarpoq.
- Nuannersuaarpoq, soorunami aamma sakkortulaarpoq. Scenit amerlanerpaat unnuakkut takutittussaagamikkit qaammatit arfineq-marluk uteqattaarluta unnukkut filmilioqattaarluta. Kisianni produktionimi taama angitigisumi peqataalluni nuannersuaarpoq.
Aka Niviâna Mørch Pedersen immikkoortup nangeqattaartuini arfinilinni tamani ilaavoq.
- Uanga inuttaaffigisara immikkuulaarpoq, taanna oqarpoq.
- Nuanneqaaq uagut kalaaliulluta oqaluttuassagut aamma takutisinnaallugit. Soorunami uani seriami Alaskamiut Inuppiaat oqaluttuaannut tunngavoq, kisianni takutissinnaallugit oqaluttuarisinnaallugillu uagut nunatsinninngaanniit qanoq ittarnersut. ingammik amerikamiut amerlasuut aatsaat Kalaallit Nunaanninngaanneersunik naapitaqarput.
Reykjavik kalaallinik ulikkaartoq
Isiginnaagassiallu Hollywoodimi sapaatip akunnerata siuliani takutinneqaqqaarnera tassunga nuanningaatsiarpoq:
- Upperiuminaassuaarpoq, tusagassiortorpassuit assiliisut amerlasuut, atiga taallugu assigiinngitsunik apersoqattarlunga.
- Filmini takunikuusagut tamakku tusaamasat misigisai. Taamatut misiginarpoq.
Angunnguaq Larsen isiginnaagassiami inuttaasut ilagaat, taassuma alaskamiu aallaaniaq inuttaaffigaa.
Taassuma Reykjavik kalaallinik isiginnaartitseqataasussanik ulikkaartoq KNR-imut oqaluttuarinikuuaa.
- Nuummi najugalippassuit kalaallillu Danmarkimeersorpassuit taamani Rekjevikkimiipput, soorunalumi nuannisaqatigeeqaagut, Angunnguaq Larsen oqaluttuarpoq.
- Nunami allamiikkaanni kalaaleqatillu peqatigigaanni kammagiinnerulernartarpoq, taamaammat taakkuulluta Reykjavikkimi unnussiuaarnerpaaluit nuannerluinnartut misigaagut.
