Aka Hansen Folketingimut qinigassanngortittoq

Kalaaleq filmiliortartoq Aka Hansen folketingimut qinigassanngortilluni nalunaartoq, Nutaarsiassaqartitsivik Sermitsiaq allappoq.

Taanna arnat pisinnaatitaaffiinik inuillu pisinnaatitaaffiinik ilungersuussilluni suliaqartarnini pissutigalugu aamma ilisimaneqarpoq.

Naapertuilluannginnerit ullumikkut suli misigineqartartut unitsinniarlugit folketingimut sassarluni Sermitsiamut oqarpoq.

Aka Hansenip Kalaallit Nunaata namminersulernissaa, inatsisitigut ataataqanngitsut pillugit suliaq aamma Danmarkimi kalaallit meerartaannik eqqunngitsumik arsaarinnittarneq pillugit Folketingimi sorsuutiginiarpai.

- Tamakkiisumik namminiilivinnissamik sorsuuteqarnermi ingerlariaqqinnissamut periarfissiisut oqaatigissallugit uannut pingaaruteqarpoq, suliassarlu taanna tigussallugu piareersimavunga, Aka Hansen Sermitsiamut oqarpoq.

Nutaarsiassaqartitsivik Sermitsiaq taama allaaserisaqarpoq.

Danmarkimi kalaallit meerartaasa eqqunngitsumik arsaarinnissutigineqartarnerat pillugu akerliussutsimik takutitsisoqartarnerani Aka Hansen aamma aaqqissuussinernut peqataasarpoq.

Folketingimut kingusinnerpaamik oktobarip 31-anni qinersisoqassaaq.