Ajunaalernermi kalerrisaarisoorneq: Naluaraluunniit susoqarnersoq
Siggartaassuaq Nuummi ataasinngornermi ualigaa kalerrisaarilermat erniinnaq paasinarsivoq kukkunerusoq, pisorlu Kommuneqarfik Sermersuup nittartakkamigut erniinnaq ajuusaarutigalugu nalunaarutigaa.
Nuummi kalerrisaarut tusalertorneqartoq paatsiveersusimaartitsilaavissorpoq, taakku ilagaat Malu Rasmussen, iliuuseqapallassimanerminik uani oqaluttuartoq.
- Meeqqaniit siulliullunga tatamingajappunga, tupannarpoq. Paasitinneqarnangalu aallartikkami immaqa sorsunnersuaqalerpoq.
Qanoq iliorpit?
- Igalaat matungaluarpakka KNR-ilu aallartillugu, susoqarnanilu.
Nuka Pivat siggartaat aallartimmat tupattunut ilaavoq.
- Nalunaaqutaq marsipallappara qassinngornersoq, eqqarsarlungalu susoqartormitaavaana? Facebookkiaasit eqqaavara, imaassinnaasoraasit arlaannik ilisisoqarsimasoq, takugaluarakku soqanngimmat puigoqqippara.
Nipi suminngaanneersoruna?
Tusaasulli tamarmik iliuuseqanngillat. illoqarfimmi kalerrisaarisoqarneranilluunniit malugisaqaratik.
Ane Jensen angerlarsimarujoortilluni, siggartaassuaq appittoq tusaavaa. Naallu nipitugaluaqisoq, ernumassutiginngilaa.
- Tusaagakku aperivunga ataatannut, katastrofealarm appinnersoq, kisianni eqqarsarluta fjernsyniminngaanneersoq ikumariarmat.
Pingajussanik kukkusoqarpoq, ajorinngiliuk kukkusoqarnera?
Ane Jensen:
- Naa, soorunami immaqa tusaasimangaluarukku eqqarsarnanga fjernsyniminngaanneersoq soorunami tupannassangaluarpoq, oqarpoq.
Uno Iversenip tusaasani aamma soqutigerpiarsimanngilai. Sineruttortormi siggartaassuaq appippoq.
- Ous, kisianni itertikkaminnga, iterluarnanngingajallunilu ernumananga, kisianni nalugakku soqutiginngiinnarpara.
Kalerrisaarut appikkaangat asuliunngitsoq paasisariaqartoq
Ukiup aappaata affaannaani kingullermi Nuummi kalerrisaarut pingajussaa kukkusumik toortoorneqarpoq. Taamaattoq kalerrisaarut appikkaangat asuliunnginnera qulakkeerniartariaqarpoq.
Kommuneqarfik Sermersuumi upalungaarsimanermut pisortaq Jes Damgaard Andersen oqarpoq.
- Ilumoortuusoq upperisariaqarpoq. Siggartaassuaq appikkaangat, tusagassiorfiit pisortaqarfiillu qanoq nalunaarnersut tamatigut paasiniarneqartassaaq.
Kommuneqarfik Sermersooq Facebook aqqutigalugu kalerrisaarutip appinneranik erniinnaq nalunaaruteqarpoq.
Upalungaarsimanermik suliaqartut kukkusoqaqqinnginnissaq qulakkeerniarlugu maanna kalerrisaaruteqarnermut atortut ajoqutaat paasiniarlugu suliniuteqarput suliniartuassallutillu.
- Kalerrisaarummik pisiffiginikuusarput attaveqatigisaqattaarparput. Soorunami kalerrisaarut apittoq tagitisariaqarpoq. Maanna kukkusoqaqqinnginniassammat uagut aamma iliuuseqarpugut, Jes Damgaard Andersen oqarpoq.
Siggartaassuit kukkunikkut Nuummi Sisimiunilu 2019-imi aamma appittoortinneqarput.