Ajornartorsiutit assigiit akiorpaat

Peqqinnissamut Naalakkersuisoq, Agathe Fontain, pernaammik ataatsimiinnermut qaaqqusisuuvoq. Tamannalu sapaatip-akunnerata naanerani kingullermi ataatsimiinnernik saqqummiussinernillu kinguneqarpoq.

Ataatsimiinnerli aalajangersimasumik suliniuteqarnissamut kinguneqanngilaq, paasineqarporli suliniutissat assigiipajaartut, isumaqatigiissutigaallu ukiumut ataasiarlutik ataatsimiittalissallutik. Aappaagu ataatsimiinneq Islandimi ingerlanneqassaaq.

Agathe Fontainip qaaqqusani ilaatigut, meeqqanut inuusuttunullu suliniutit, atornerluineq, imigassamut inatsit, sukkortut kiisalu inuunerissaasarfik nutaaq pillugit saqqummiiffigai.

Agathe Fontainillu pissarsiani, inuusuttut pujortartarnerannut pinaveersaartitsinermut tunngatillugu, Islandip iliuuserisaa assilerusuppaa.

Islandimimi inuusuttut 5 procentii pujortartarput. Nunatsinnilu naatsorsueqqissaartarfimmi kisitsisit 2006-imeersut takutippaat, 15-inik ukiullit agguaqatigiisillugu 43 procentii sapaatip akunneranut ataasiarlutik pujortartartut.

Islandimilu iliuuserineqartoq ajornanngitsoq, Peqqinnissamut Naalakkersuisup oqaluttuaraa.

- Ersarissitikkamikku, qanoq angajoqqaat tassani peqataanissaat pingaaruteqartigisoq. Angajoqqaat pisussaaffimminnik naammassinnippata, taava aamma pisortat, atuarfeqarfiit allatigullu malinnaaqataappata pitsaasumik kinguneqarsinnaasoq, Peqqissutsimut Naalakkersuisoq Agathe Fontain oqarpoq.

Nunatta Savalimmiuninngaanniit ilikkarusuppaa, napparsimasut nalunaarsorfii qarasaasiakkut elektroniskimik ataatsimut katersorneqartarnissat. Savalimmiuni nalunaarsuiffiit ineriartortinneqarnerat piariingajalerpoq, Agathe Fontainillu oqaatigaa, Nunatsinni aamma taamaaliortoqassasoq.

- Taanna Nunatsinni pilerigisorujussuuarput aallartisarniarlugulu, taamaammat Savalimmiuni ingerlatsinerat paaserusuttorujussuuarput. Taamaakkami tassuunakkut pissarsilluarpugut, Agathe Fontain taama oqarpoq.

Islandimi Atugarissaarnermut ministerip, Gudbjartur Hannessonip oqaatigaa, Islandi Nunatsinnit ilikkagassaqarluartoq.

- Qarasaasiaq atorlugu nakorsiartitsisarneq Islandimi atunngisarput, aammalu ataatsimoorussamik suleqatigiissutigisimasarput Tunumit nakorsianik timmisartuussisarneq suli atorluarnerusinnaavarput, Islandip Atugarissaarnermut ministeria taama oqarpoq.

Ministerillu aamma oqallisigaat nunanik allanik suleqateqarneq. Assersuutigalugu Savalimmiut Islandilu isumaqatigiissuteqareerput, napparsimasut Reykjavikip napparsimavianukaanneqarsinnaasut suliaritikkiartorlutik. Aammali isumaqatigiissummi ilaavoq, Islandimiit nakorsat Savalimmiunukartinneqarsinnaasut suliarinnikkiartorlutik.

- Tamannalu aamma Kalaallit Nunaallu suleqatigiilluta ineriartortissinnaavarput. Islandip Atugarissaarnermut ministeria oqarpoq.

Savalimmiunini Peqqinnissamut ministerip Karsten Hansenip, Nunatta inoriaatsimik patsiseqartumik napparsimalertarnermut, soorlu sukkornermut suliniutai ilaat paasisani ilaatigut ilaarusuppai.