Air Greenlandimi sulisut immikkut aaqqissuussiffigineqanngitsut

Danmarkimiit Kangerlussuarmut timmisartumut ilaasut covid-19-imik tunillaassuilerput, ilaasullu tunillanneqarsimasut sinerissamut ingerlaqqimmata tuniluunneq aallartillugu.

Tamanna tunillaatiaqisup deltavariantip maani tunillaassuunnerata uppernarsineqarnerani pivoq. Air Greenlandip sulisui nunatsinni illoqarfiit taavalu nunatta Danmarkip akornanni silaannakkut angalajuarput. 

AAMMA ATUARUK Delta timmisartorsuarmi Købenavnimit juulip arfernani nunatsinnukartumi tuniluuttoq

Taakkuali siulliullutik misissortinnissaminnut akiuussuserneqarnissaminnulluunniit periarfissinneqanngitsut, Air Greenlandimi attaveqaqatigiinnermut pisortaq, Katja Vahl KNR-imut allappoq.

- Air Greenlandimi sulisut suliffeqarfittulli aammalu innuttaasutulli allatuulli pisinnaatitaaffeqarput killilersuuteqarlutillu. Innuttaasut covid-19-imut ersiutillit, immaqaluunniit oqartussat tuniluuttoqartillugumisissortinnissamut kissaateqartarput, assersuutigalugu juulip ulluisa arfernani angalasimasut, taanna allappoq.

AAMMA ATUARUK Tamaat isigalugu: Coronavirus pillugu killiffik

Tamannalu peqqutigalugu Sisimiut Qaqortorlu matuneqarput Air Greenlandimilu sulisut misissorneqarlutik. Oqartussat kaammattuuteqarneratigut sulisut misissorneqarsinnaasimapput.

- Air Greenlandip mianersorumalluni saqisut aquttullu kalluagaasut tunillanneqarsimannginnera uppernarsitserlugu sulisinngilai, Katja Vahl oqarpoq.

Upernavimmi Tasiusamilu inuit aqqaneq marluk tunillanneqarsimasut paasineqarput, taakkunaniittullu tassaapput aamma akiuussuserneqarnissaminnut akuersisimanngitsut.

Nunatta Nakorsaaneqarfiani nakorsaq, Paneeraq Noahsen taama paasissutissiivoq. 

- Tuniluunneq qimerluussagaanni, tunillanneqarsimasut tassaapput akiuussuserneqarsimanngitsut, taakkulu tunillaassuillutik. Taamaammat taakkua akiuussusertinnissat kaammattuutigaarput, Paneeraq Noahsen oqarpoq.

Nunatsinni covid-19-ertut katillugit 40-upput, aatsaallu ataatsikkut napparsimasut taama amerlatigalutik.