Delta timmisartorsuarmi Købenavnimit juulip arfernani nunatsinnukartumi tuniluuttoq
Covid-19-it ilaat, Delta Danmarkimit nunatsinnut timmisartorsuarmut juulip ulluisa arfernanni tikiunneqarsimasoq uppernarsarneqarpoq. Tassangalu Ilulissanut, Sisimiunut, Nuummut kingornalu nunatta kujataanut siaruulluni.
Nunatta kujataani ilaatigut Qaqortumi tusarnaartitsisoqarneranit illoqarfimmi tuniluuttoqalerpoq.
AAMMA ATUARUK Qaqortumi coronamut misissuiffimmik pilersitsisoqalersoq
Nakorsaaneqarfiulli tamanna tupaallaatigivallaanngilaa:
- Tuniluutianerusumik siaruaattoqarnera ilimagalugu sulissuteqareerpugut, maannalu qulakkeerlutigu.
- Delta Danmarkimi piffissami kingullermi tuniluunnerpaavoq, taamaammat ingerlatseriaatsit suliniutillu sapaatini akunnerni kingullermi malunni aallartitagut taama ilimasuuteqarnermik tunngaveqarput, Nakorsaaneqarfimmit, Paneeraq Noahsen oqarpoq.
Nuummi Upernavimmi tuniluuffiusutut ilisimariikkani sorlermik tuniluuttoqarnerata paasiniarneqarnera suli utaqqimaarneqarpoq.
Misissukkat tunillatsittoqarsimaneranut uppernarsaataasut tamarmik Danmarkimut misissoqqissaarneqartussanngortillugit nassiunneqartarput, tassanilu covid-19 sorleq pineqarnersoq paasiniarneqartarluni.
Nunatsinni tunillatsissimasut maanna 30-upput. Sapaatit akunnerisa pingasut ingerlaneranni tuniluuttoqangaatsiarpoq, Upernavimmi maanna tuniluuttoqangaatsiarpoq, Nuummi Qaqortumilu maanna arlalinnik aamma tunillatsissimasoqarpoq.
Nunatsinni coronamik siorna marsimi tunillatsissimasoqaqqaarneranit tunillatsissimasutut nalunaarsorneqarsimasut piffissami amerlanerpaaffigisaat 30-upput.
92-it tunillatsissimasutut nalunaarsorneqarnikuusimapput.
Coronavirusini tuniluutianerusoq Delta ilaatigut Danmarkimi tuniluunnerpaat ilagaat, taannalu juuli qaammat tamaat tuniluunnerpaalluni.
Delta Indiamit nunatsinnukartoq
Delta Indiami siorna oktobarimi siullermik paaseqaqqaarpoq, Deltamillu Danmarkimi tunillatsissimasoq siulleq apriilimi paasineqarluni.
Delta Danmarkimi piffissam matumani aamma tuniluuppoq. Danmarkimi tunillatsissimasut quliungaangata ikinnerpaamik arfineq-pingasut Deltamik tunillatsissimasuusarput.
Nunat tamalaat peqqissutsimut suleqatigiiffiat, WHO naapertorlugu Delta nunarsuarmi qaammatini aggersuni tuniluunnerpaanngussaaq.
AAMMA ATUARUK Delta nunatsinnut annguttoq
Delta coronavirusit ilaannit Alphamit aamm Tuluit Nunaanni allanngorsimasutut taagorneqartartumit 50 procentit missaannik tuniluutianeruvoq.
Tamatuma saniatigut Delta napparsimarulutsitsisinnaasutut nalilerneqarlunilu akiuussutissat tassunga pitsaavallaassanngitsutut nalilerneqarpoq. Akiuussutissalli suli iluaqutaassapput.
Pfizerimit Modernamiillu akiuussutissat nunatsinni atorneqartut Deltamut illersuutaasinnaapput.
Akiuussutisserneqareeraluarlutik tunillatsissaguit covid-19-it ilaannik tunillatsinnertulli tunillatsissimanerni napparsimannginnerussaatit.