Air Greenlandimi atorfillit 60-it suliffeerutissasut
Air Greenlandimi atorfillit 60-it suliffeerutissapput.
Air Greenland timmisartuutileqatigiiffimmi soraarsitsinissaq pillugu taama paasissutissiivoq.
- Suliami tassani atorfillit kattuffiillu sulisut ilaasortaaffigisaat qanittumik suleqatigaagut, tamatumalu kingunerisaanik ataatsimoorluta sipaarfigisariaqakkagut nassaarisimalerpagut, pisortaaneq, Jacob Nitter Sørensen oqarpoq.
Atorfillit 60-it soraarsinneqartussat saniatigut atorfiit inuttaqanngitsut inuttalerneqassanngillat, atorfiillu piffissap ilaannaani atorfigineqartussat inuttalerneqassanatik.
Ukioq kaajallugu atorfiit katillugit 111-it atorunnaarsinneqarput.
35 procentimik ikileriassasut
Air Greenlandimut ilaallutik nunatta iluani imarpillu qulaallugu angalasut aappaagu 30-35 procentimik ikileriarnissaat naatsorsuutigineqarpoq.
Angallaviit ingerlatseqatigiiiffiup kaaviiaartitaani annerpaapput, taamaammat Air Greenland minnerpaamik 225 millionit koruunit sipaarniarluni nassaarisariaqarpai.
AAMMA ATUARUK Naalakkersuisut Air Greenlandilu: Timmisartumut billetsit akikitsut utertinneqarsinnaalerput
- Angalanissanut pilersaarutigut naleqqussarpagut aammalu sipaarutissanik arlalippassuarnik aallartitsilluta, kisiannili ajornartoorneq annertuvoq, aammalu sulisutsinnik pikkorissunik soraarsitsiortornissaq avaqqussinnaanngilarput, tamannalu alianartorujussuuvoq, Jacob Nitter Sørensen oqarpoq.
- Pissutsit ilungersunaraluartut sulisut ataatsimut aaqqiissutissat ajornakusoortut, pisariaqavissulli nassaariniarlugit tunniusimalluinnarlutik suliniuteqarnerat pillugu nersortorujussuuakka, pisortaaneq oqarpoq.
Ajornartoorneq unammillernartoqartitsiinnartoq
Air Greenlandip soraarsitsisariaqarnissani maajip ulluisa 5-ianni nalunaarutigaa.
Air Greenlandip timmisartukkut angallassinerit tamarmik marsip ulluisa 20-anni matuai. Nunatta iluani angallannerit kingorna ammaanneqaqqipput, ulapalungaarsimanermilu pilersaarut Islandimut Danmarkimullu timmisartuussinernut atuutilersinneqarluni.
Ajornartoornerli Air Greenlandimut ajornartorsiortitsisorujussuuvoq. Timmisartortitseqatigiiffik arlalinnik iliuuseqarniarsarigaluarpoq, IT-kkut atortorissaarutinik taarsiineq, sillimmatinik pisiortorneq, siunnersortinik atuineq, pikkorissaaneq aningaasaliinerillu pisariaqavinngitsut taamaatinneqarput.
Aammattaaq sulisunut ilaatigut akissarsianik uninngatitsinissamut sulinngiffeqarnissamut isumaqatigiissuteqartoqarpoq.
Aasaaneranilu saqisutut sulisinneqartartut ukioq manna immikkut atorfinitsinneqassanngitsut ilisimatitsissutigineqarpoq.