Air Greenland timmisartornermi annilaangasartunut podcastiliortoq
Nunatsinni najugaqaraanni timmisartornermilu annilaangasaraanni qanoq iliortoqartarpa?
Apeqqut tamanna nunatsinni timmisartuutileqatigiiffiup Air Greenlandip maanna akissuteqarfiginiarsaraa. Tamanna inunnut timmisartornermi toqqissisimaneq ajortunut imaluunniit annilaanganartunut podcastikkut nutaakkut akissuteqarfiginiarneqarpoq.
- Nalunngilarput inuppassuit timmisartornissartik toqqissisimanngissutigisaraat. Immaqa nunarsuarmi angallannermut atortuni nutaanerpaammat, taamaammat naak nunatsinni sumiluunniit najugaqaraluaraanni atugassaritigaasuugaluartoq tamanna kinguaariinni piginikuunngilarput.
- Tamanna Air Greenlandimit ilungersuutigalugu sulissutigaarput, Air Greenlandip niuernermut pisortaa, Katja Vahl oqarpoq.
Tusarnaagassiaq podcasti pingasunik immikkoortulik Air Greenlandip saqqummerseqqammerluinnarpaa. Immikkoortuni siullerni marlunni kaptajnip Jens Ploug Larsenip timmisartornermi susoqartarnera, atortorissaarutit qanoq atuuteqarnerat timmisartumilu ilaasut nipit assigiinngitsut tusaasinnaasaat suunersut oqaluttuarai.
Immikkoortut pingajuanni hypnotisøriisartup tusarnaartoq qasuernissamut sungiusaatinik ilinniartippaa.
Naakkut anniarneq ajunaarnersuarmillu eqqarsaateqarneq
Anja Petersen Weiss Nuummeersoq timmisartumut ilaanissaminut ukiuni 25-ni tamaviaartariaqartarsimavoq.
Taanna timmisartornissaminut ullut arlallit sioqqullugit naaminik annialerajuttarsimavoq – timmisartumilu ingereeraangami tamanna pitsaanerulerneq ajorpoq.
- Nangiartarnikuuninnut pissutaanerpaarpasipput immaqa susoqassasoralugu timmisartornerup nalaani, taava eqqissiveerunnerit, eqqarsaatit aqutsisunngoraangata sajulerlungalu qialertarnikuuvunga, taanna oqarpoq.
Anja Petersenillu timmisartumik angalanissaa inuuniutaata ilaatut pingaaruteqarpoq. Taannami Kommuneqarfik Sermersuumi angalalluni siunnersuisartutut sulisarpoq, taamaammat nunatta kitaanut angalakulalluni.
Taassuma timmisartornermi annilaangasarnini saqisunik timmisartumilu aquttunik oqaloqateqarnikkut qaangerniartarsimagaluarpaa. Timmisartornerullu ingerlanerani susoqartarneranik paasisaqarneq annilaangasarnermi akiornissaanut iluaqutaangaatsiarsimavoq.
Timmisartornermilu nipit nipituut annilaanganeranik aallartitsisinnaasarsimapput.
- Timmisartumi aquttup pitsaalluinnartumik assersuuteqarfiginikuuaanga. Umiatsiamik angalagaanni mallit malinneqartarput, taamaalilluni nipit allanngortarput. Silaannarmiikkaanni aamma taamaappoq. Taamaammat timmisartup sumut sammiveqarnera apeqqutaalluni nipit assigiinngitsuusarput, taanna oqarpoq.
Imminut ikiornissamut ikiuut
Air Greenlandimit Katja Vahlip annilaangasarnermik angalanissaq sioqqullugu nalunaaruteqarnissaq periarfissaajuaannarsimavoq, sulisut taamaalillutik ikiusinnaasarlutik.
Inuilli amerlanerusut timmisartornermi annilaangasarnermik nalunaarutiginnittartut amerlanerat Air Greenlandip ukiuni kingullerni maluginiarpaa.
- Inuppassuit piareersarsinnaaniassagamik timmisartornermut atatillugu paasissutissiiffigineqarnerunissamik pisariaqartitsisut maluginiarpagut. Tamannalu tunngavigalugu tillernerup sukkavallaalerneranik appartitsinissamut timmisartornerullu nalaani qasuersimanissamut imminut ikiorsinnaanissaannut sakkussamik pisariaqartitsisoqartartoq nalilerparput, Katja Vahl oqarpoq.
Anja Petersen Weissip inunnut immisulli timmisartornermi annilaangasartunut ikiuisoqarnerunissaa piffissami sivisuumi utaqqisimavaa.
Taamaammat tulliani timmisartornissaminut suna tusarnaassanerlugu nalunngilaa.
- Kiisami piffissanngorpoq. Paasititsiniaanermit uanga nammineq amigaatiginikuuakka paasissutissat assigiinngitsut timmisartumut atatillugu. Taamaattumik torragivara kiisami saqqummertoqartoq, taanna oqarpoq.
Podcasti kalaallit, danskisut tuluttullu tusarnaarneqarsinnaavoq, taannalu podcastimut app-imi nassaarineqarsinnaalluni.
