Air Greenland taarsiisariaqassaaq

Ilaasussat timmisartortartunik mattussinerup nalaani Danmarkimi utaqqisinneqartut, EU-p peqqussutai naapertorlugit 400 euronik, tassa 3.000 koruuninik, taarsiivigineqarnissaminnut pisussaatitaapput.

Allattoq Apollo Jeremiassen

januaarip 16-at 2011 12:45

Aningaasat saniatigut unnuinernut nerisaqarnernullu akissaajaatit utertinneqarsinnaasut atuagassiami Travel People Magazinemi allaaserineqarpoq.

Ilaasussat ullut arfineq-marluk sioqqullugit nalunaarfigineqarsimannginnerat peqqutaalluni Air Greenland taarsiissutinik agguaasariaqassaaq. Timmisartortartunik mattussisoqarmat timmisartuussinissat ullormiit ullormut unitsinneqarput.

EU-p peqqussutai naapertorlugit allassimagaluarpoq pissutsit immikkukajaaq ittut pissutaappata, ilaasussat taarsiivigineqarsinnaanngitsut. Kisiannili Danmarkip Angallannermut Aqutsisoqarfia aamma Statens Luftfartsvæsenip naliipput, timmisartortartunik timmisartumilu saqisunik, Air Greenlandip mattussinera immikkukajaaq ittuunngitsoq.

Timmisartortartunik mattussinissap aallartinnginnerani Air Greenland siusingaatsiartukkut nalunaaruteqarpoq, taamaattorli ilaasussat nalunaarfigineqarsimanatik.

Kalaallit Nunaanniit ilaasussat Danmarkiliartut, 400 euronik taarsiivigineqarsinnaanngillat. Tamatumunnga pissutaavoq Kalaallit Nunaat EU-mut ilaasortaanngimmat taamaammallu EU-p angallannermut peqqussutaanut attuumassuteqarani.

Air Greenlandilli immikkukajaaq iliuuseqarnermigut Kalaallit Nunaanniit ilaasussat unnuineri aamma ullaakkorsiorneri akilerpai. Ulloqeqqasiornerilli unnukkorsiornerillu akilersimanagit. Aaammalu taarsiissutinik taakkununnga akiliisimanngillat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.