Air Greenland ammaqqinneq pillugu: Angallasseqqilerpugut
![](/sites/default/files/styles/image_934x467/public/article_images/airbus_norsaq_simonuldum.jpg?itok=KtSVdalS)
Kalaallit Nunaannut tikittartut marlunngorpamiit killilersorneqarunnaassapput.
Tamanna soorunalimi nuannersuuvoq, Air Greenlandimit taama oqarput, nalinginaasumik timmisartuussisaleqqinnissaminnut timmisartuutileqatigiiffimi qilanaarput.
- Silaannakkut angallassinerit imaannaanngitsunik atugaqarfiunikuupput.
- Piginnittutsinnik patajaatsumik suleqarsimanerput pissutigalugu iluatitsilluarpugut, tapersersorluarsimavaatigut, taama oqarpoq timmisartuutileqatigiiffimi Air Greenlandimi paasissutissiinermi pisortaq Masana Egede.
- Nunap ataqatgiiinneranut attaviup ilaattut peqataalluta imaannaanngitsunik atugaqarfiusumi ataatsimoorluta qulakkeersimavarput, maannalu nalinginnaasummik timmisartuussisaleqqinnissarput suliassaavoq.
AAMMA ATUARUK Nunarput ammaqqilertoq: Nunatsinnut angallanneq sapaatit akunnerata tulliani tamakkiisumik ammassaaq
Naalakkersuisut siulittasuata Kim Kielsenip Kalaallit Nunaannut angalaneq killilersorneqarunnaartoq sisamanngornermi ualikkut nalunaarutigaa.
- Nalinginnaasumik pitsutsinut atugaqalernissatsinnut soorunami qilanaarpugut. Tamanna soorunami nuannersuuvoq.
- Tuniniaaneq qanoq ingerlanersoq takoqqaalaassavarput, inuit angalanissaminnut qanoq toqqaasimanersut apeqqutaalluni, Masana Egede oqarpoq.
Nunatsinnut tikittartut sapaatip akunneranut amerlanerpaamik 600 -uussasut 15 juni atuutilerpoq.
Timmisartuutileqatigiiffik Air Greenland qaammatinut tulliuttunut angalanissanut tuniniaanini aallartereerpaa.
- Killilersuinerup nalaani billitsit tuniniarneqarsinnaasut kisimik pisiarineqarsinnaasimapput.
- Billitsit sinneruttut maanna tuniniarpagut, Masaana Egede taama oqarpoq.