Air Greenland: Assartuussineq ajornartorsiorfiusinnaanngussaaq
Timmisartummi minnerusut, tassa akunnattumik sivisussusilimmik timmisinnaasut, Air Greenlandip mittarfinnit 1799 meterisut takitigisunit atulissappagit timmisartut pineqartut usisinnaassusaat killeqassaaq, allaammi affaannanngorsinnaallutik.
Aamma atuaruk Kangerlussuup mittarfiata ilaa qajannartoq
Air Greenlandip timmisartuutaa Airbus 330 15 tonsinik usisinnaavoq, tassa ukiumut 2000 tonsinik usisinnaalluni, timmisartulli minnerit atorneqalissappata ukiumut assartorneqarsinnaasut 1000 tonsit missaanniilissapput. Mittarfiimmi naannerusut, tassa 1799 meterisut takitigisut atorneqalerpata Air Greenlandip timmisartoq Airbus 320 atortariaqalissavaa, assartorneqarsinnaasussat taamaalinikkut annikinnerulissallutik.
Allakkat poortukkallu inatsisitigut salliutinneqartussaanerat eqqarsaatigalugu niuernikkut assartuinernut nalinginnaasunut inissaqarpallaarnavianngitsoq, Air Greenlandip pisortaanerata Michael Højgaardip oqaatigaa:
- Ukiumut assartukkat 2000 tonsit tamaasa assartornissaannut pisussaaffeqanngilagut. Sapinngisatsinnik suut tamaasa niuernerpalaartumik ingerlappavut. Ilisimaneqaannassaaq taamatut aaqqissuussinermi assartuussineq ajorsartussaammat, Air Greenlandip pisortaanera Michael Højgaard AG-mut oqarpoq.
Aamma atuaruk Mittarfiit ilaasa tallineqarnerisigut angalariaatsit allanngussapput
Mittarfiillu 1799 meterit atorneqarnerulerpata ullut timmisartuussiffiusinnaasut ikinnerulernissaat aamma naatsorsuutigineqarsinnaasoq, Air Greenlandip pisortaanerata oqaatigaa, mittarfinni naannerusuni miffissaq quasarpat timmisartuussinerit taamaatiinnarneqartut amerlisinnaassammata:
- Timmisartut timmisinnaassusaat aallaavigalugu mittarfik 1799 meteriusoq killeqartupilussuussaaq. Ilaasoqassuseq timmisartuussinissarlu eqqarsaatigalugit mittarfiit takinerusut silatusaarnerussapput, Air Greenlandip pisortaanera Michael Højgaard AG-mut oqarpoq.
Aamma atuaruk Kangerlussuup siunissaa Inatsisartunit aalajangerneqassaaq
