Mittarfiit ilaasa tallineqarnerisigut angalariaatsit allanngussapput
Naalakkersuisut siunniussaat malillugu, Nunatsinni mittarfeqarneq allanngussaaq.
Tamanna paasinarsivoq, attaveqarnermut naalakkersuisup, Knud Kristiansenip mittarfiit pillugit siunnersuutini, tusagassiortunik ullaatungaa katersortitsinermi tusarliummagit.
Mittarfiit tallineqartussatut qangali oqallisigineqartut tassa Nuummi Ilulissanilu mittarfiit piviusunngortussanngorpoq. Ilulissat mittarfiat 2200 meterimut tallineqartussanngortoq Nuummi mittarfik 1799 meterimut tallineqassaaq.
Aamma atuaruk Naalakkersuisut katillugit 7247 meterinik mittarfiliorusupput
Kangerlussuaq atorneqaannassaaq
Mittarfiit taakku tallineqarnerisigut Kangerlussuarmi mittarfik qitiusumik mittarfiujunnaarsinneqartussanngorpoq. Taamaattorli taassuma maannamut takissusaa siunissaq qaninnerusoq isigalugu attatiinnarneqartussaasoq, attaveqarnermut naalakkersuisup, Knud Kristiansenip erseqqissaatigaa.
- Kangerlussuaq pillugu pilersaaruteqarnerput aamma neriuuteqarnerput maannamut suli attapparput. Kisianni Kangerlussuup aserfallatsaalineqarnissaanut aningaasartuutit amerlapput. Taamaammat suliaq tassanngaanniit aallartittumik tigusariaqarparput. Oqaatigissavarali Kangerlussuaq pillugu naalakkersuisut allannguutinik soqanngimmata, Knud Kristiansen oqarpoq.
Kangerluussuup ullumikkutut atorneqarnera eqqartoqqinneqartariaqartoq, Knud Kristiansen isumaqarpoq aammali Kangerlussuup Nunatta takornariaqarneranut aamma inuussutissarsiorneq eqqarsaatigalugu, pingaaruteqarluratuunera puigorneqassanngitsoq taanna isumaqarluni.
- Kangerlussuaq mittarfeqarfittut atuinnarneqarnissaa ilimagaara. Kisianni Nunatta isaaviatut pingaarnertut atorneqarnissaa ilimanarani. Tassami angallannerup ullumikkut isikkuata, kisitisitullu pigeriikkatta takutippa, tassami Kangerlussuaq aqqusaaginnarneqartarpoq, tassami ilaasut amerlanerit Nuummukanngikkunit Ilulissiartarput. Taamaattumik Kangerlussuaq siunissami qanittumi pingaarnertut Nunatsinnut isaaviunissaa ilimananngilaq.
Attaveqarnermut naalakkersuisoq, Knud Kristiansen taama oqarpoq.
