Kangerlussuup siunissaa Inatsisartunit aalajangerneqassaaq
Kangerlussuarmi mittarfiup sananeqarnermini nunataata qeriuaannartup aakkiartornera pissutigalugu mittarfik imillutsiternerujartorpoq. Nunatta isaariaata siunissaa Inatsisartut aalajangertariaqalivippaat.
- Kangerlussuaq maanna pitsaanngitsumik inissisimavoq. Qeriuaannartup aakkiartulernera pissuteqartumik ajortinnikuunera pissutigalugu taamatut kinguneqarpoq, attaveqarnermut naalakkersuisoq, Knud Kristiansen (Atassut) KNR-imut oqarpoq.
Kangerlussuullu siunissaa pillugu pissangassuteqarpoq.
- Inatsisartut aalajangertariaqalertussaagamik, piffissap ilaani, imaluunniit siunissami qaninnermi, Kangerlussuaq annikillissaneripput, imaluunniit aningaasaliiffigeqqillugu pitsaassuseq naammaginartoq atiteqqinnissaanut iluarsartariaqassanerigut, Knud Kristiansen oqarpoq.
Nalunaarusiaq utaqqivaa
Kangerlussuarmi mittarfiup ajornartorsiutaata suliarinissai, taamatullu ukiut qulit tulliuttut atorsinnaanissaanut aaqqissornissaanut aningaasartuutit 750 millioner koruunit missaanniissasut Knud Kristiansen siornatigut oqarpoq.
Missingersuisoqaqqinnikuuvorli, tassanilu illuliatoqqat aserfallassimaneri, anartarfiillu aqqutaat ilaatigut misissorneqarlutik.
Taakkulu ilanngullugit mittarfiup suliarineqarnissaa 2 milliarder koruuninik akeqarsinnaassasoq missingersorneqarpoq.
Aamma atuaruk Kisitsisit nutaat Qeqqata borgmesteriata nassuiaqqugai
Aamma atuaruk Air Iceland Kangerlussuarmut timmisartuussisalissaaq
Ajornartorsiulli qanoq annertutiginersoq Knud Kristiansenip maanna eqqoriarusunngikkallarpaa.
Mittarfimmimi pissutsit pillugit suliniaqatigiit maanna misissuipput, Kangerlussuarmilu mittarfiup siunissaa pillugu politikerit aalajanginnginnerminni suliniaqatigiit inerniliussaat takoqqaartussaavaat.
- Nalunaarusiaq qanittunnguami saqqummertussaq utaqqivara. Pissangagivara taanna qanoq oqariartussanersoq, Attaveqarnermut naalakkersuisoq oqarpoq.
300 meteri atorneqarneq ajorpoq
Mittarfiup maanna qanoq innera pissutigalugu timmisartut mileraangata mittarfiup ilaa atorneqarneq ajortoq, Knud Kristiansen aamma nassuiaavoq.
- Maannarpiaq killiffimmi, timmisartorsuaq minniarnermini 300 meterit missaanik ingerlaareerluni aatsaat mittarpoq, attaveqarnermut naalakkersuisoq Knud Kristiansen taama oqarpoq.
