Kisitsisit nutaat Qeqqata borgmesteriata nassuiaqqugai
Kangerlussuarmi Mittarfimmut aningaasaliisoqaqqinnissaa pisariaqartinneqartoq pillugu Hermann Berthelsen, Ineqarnermut, Sanaartornermut Attaveqarnermullu Naalakkersuisumit Knud Kristiansenimit juulimi aggustimilu allaffigineqarpoq, mittarfimmullu aningaasaliissutigineqartussatut missingersuutit 725 millionit koruuniusut paasinarsivoq:
Mittarfiup saavanilu inissiivimmut Mittarfeqarfiillu illutaasa nutarterneqarnissaannut aningaasaliisoqarnissaa ilaatigut allaaserineqarpoq, Knud Kristiansenilu sapaatip-akunnera ataaseq qaangiummat, tassa aggustip ulluisa arfernanni, allagaqaqqimmat, aningaasaliissutigineqartussatut naatsorsuussat 975 millionit koruuninngorsimapput. Mittarfiup eqqaalu Mittarfeqarfiullu illutaasa nutarterneqarnissaannut aningaasaliisoqarnissaa matumani eqqarsaatersuutaavoq.
AAMMA ATUARUK Kangerlussuarmi umiarsualivik inerisarneqartariaqarpoq
Kisitsisit nutaat paatsiveerunnartikkai
Kisitsisilli qaammatip ataatsip ingerlanerinnaani 725 millionit koruunioriarlutik 2 milliardit koruuninngorsinnaanerat Hermann Berthelsenip tupigusuutigai, tassami Jens-Erik Kirkegaardip § 37 naapertorlugu apeqquteqaataanut atatillugu Knud Kristiansenip juulip ulluisa 28-anni akissuteqaataani ilaatigut oqaatigineqarmat Kangerlussuarmi aningaasaliisoqaqqinnissaanut atatillugu 2 milliardit koruunit atorfissaqartinneqartut, tassa pisariaqartinneqartut arfinileriaatingajaannik annertusisimallutik.
- Juulip 28-ani uannut allakkianni 725 millionit koruunit taaneqartut, 2015-imi aggustip arfernani 975 millionit koruunit taaneqartut, 2015-imi aggustip 28-ani Jens-Erik Kirkegaardimut allakkianni 2 milliardit koruunit taaneqartut eqqarsaatigissagaanni qaffariaat annertoorujussuuvoq. Naatsorsuinera malillugu mittarfimmut saanilu inissiivimmut aningaasartuutissat 250 millionit koruuninit 500 millionit koruunit sinneriarlugit 1,525 milliardit koruuninik qaffariaateqarput, Hermann Berthelsen, Knud Kristiansenimut ammasumik allagaqaateqarnermini ilaatigut allappoq, nangillunilu:
- Taamatut nutaamik naatsorsuisimanermut atortut tigunissaat qilanaaraara, taamaalilluta Kangerlussuup siunissaa pillugu aaqqiissutissarsiorluta pitsaasumik oqaloqatiginnittarnigut ingerlateqqinniassagatsigit, Hermann Berthelsen oqarpoq.
