Kangerlussuup mittarfiata ilaa qajannartoq
Kangerlussuarmi mittarfik Nunatsinnut angallannikkut qitiusumik ukiorpassuarni atuuppoq. Nunali qeriuaannartoq maanna ajornartorsiutaavoq, mittarfiullu misissuiffigineqarnerani paasineqarpoq immikkut ittumik sianigisassaqartariaqartoq.
Suliffeqarfik Sweco misissuinermik ingerlatsisuuvoq, Kangerlussuarmilu mittarfiup misissuiffigereernerani suliffeqarfik inerniliivoq mittarfiup qajannaassusianik misissueqqittoqartinnagu mittarfiup kitaatungaa 250 meterisut isorartutigisoq kiisalu kimmut "overrun-ertarfik" timmisartunit aqqutigineqassanngikkallartoq.
Aamma atuaruk Kangerlussuup siunissaa Inatsisartunit aalajangerneqassaaq
Mittarfik taamaalilluni 2560 meteriinnanngorpoq. Mittarfiulli sinnera aamma pitsaanerpaarsuunngilaq. Atorneqarsinnaasoq nalunaarusiami allaaserineqarpoq, tamannali killilersuinerit atuutilersinneqartut malinneqarnerisigut aatsaat pisinnaasoq oqaatigineqarluni. Timmisartut qanoq useqartigisinnaanerat ilaatigut tamatumani pineqarpoq.
Nalunaarusiaq maanna kalaallisuunngortinneqarluni nutserneqaleruttorpoq, Inatsisartunillu atuarneqareerpat aatsaat avammut saqqummiunneqassalluni, Knud Kristiansen taama nassuiaavoq.