Air Greenland assakaasuminik qaartoorsimalluni mianersorluni Nuummut mittoq

Air Greenlandip timmisartuisa ilaat Kulusummit ingerlaartilluni Nuummut mittariaqalersimavoq.

Dash 8-p minnermi assakaasuata qaartoorsimanera tamatumani pissutaavoq.

Air Greenland nittartakkamini pingasunngornermi ullaap tungaani taama allaaserisaqarpoq.

Ilaasumit paasineqartoq

- Kulusummiit ingerlaarnitsinni timmisartoq Nuummut mittussanngormat assakaasut assakaasoqarfimmiit apparneqarmata assakaasoq ataaseq pullaarsimasoq ilaasut ilaannit paasineqarpoq. Minnissamullu minutsit marluinnanngorlutik, timmisartup naalagaa, Edd Arne Lund pisoq pillugu oqarpoq.

Timmisartumi inuttat Edd Arne Lundip aquttullu Jakob Blaabjergip Kangerlussuarmut minnissartik isumaliutigigaluarpaat, Nuummili mittarfik maanna silinnerulernikuummat miffiginiarlugu aalajangerput, Air Greenland allappoq.

Assakaasup qaarsimaneranut Kulusummi mittarfiup ujaraaqqanik qalligaasoq pissutaasinnaasoq, Edd Arne Lund oqarpoq.

- Kulusuup mittarfiani ujaraaqqanik qalligaasumi qangattarnitsinni minnitsinnilu assakaasut artorsartinneqarnermikkut qaarsinnaapput.

 Taamaattumillu ilaasutsinnut pingaaruteqarpoq, taama pisoqarnerani aalajangersimasunik malitassaqarnitta ilisimanissaa. Pisumi uani timmisartortartut assakaasup qaarsimanera uppernarseqqaarlugu iliuusissamik nalilersuissapput. Pisumillu Air Greenlandimi timmisartuussinernut aqutsivik, OP, nalunaarfigineqassaaq, timmisartup naalagaa oqarpoq.

Air Greenlandip oqarnera naapertorlugu Nuummut minneq 'mianersortumik' minneruvoq.

Ilaasut aqqutaa tamaat paasissutissiiffigineqartut

Nuummi Mittarfimmut minnginnermi qatserisartut biilii piareersarneqarput, ilaasullu 26-t ingerlaarup tamaani qanoq pisoqarnissaanik paasissutissiiffigineqartarput.

Taamaattumik Air Greenlandip pisoq pinartoqanngitsumik minnertut aamma nassuiaatigaa.

Sila pissutigalugu kinguaattooqqasut arlallit aaqqiiviginiarlugit timmisartumi inuttat allat kinguaattooqqasunik, ilaasunillu Kulusummut Kulusummiillu ingerlasussanik isumaginnilerput.

Timmisartup 'mianersortumik minnera' ataani videoliami takusinnaavat.