Air Greenland Aalborgimiit timmisartuussinerusalissasoq
Nunatta Danmarkillu akornanni timmisartukkut aqqutit nutaat nalunaarutigineqarnerat imaaginnavipput.
Air Greenlandip Nuup Aalborgillu akornanni timmisartuussinermut aqqut nutaaq aamma ammarlugu nittartakkamini nalunaarutigaa.
Aasaanerani timmisartuussinermi aqqutaassaaq, tamanna 2025-mi juunip 18-ianit aggustip 27-anut sapaatip akunneranut marloriarluni aqqutaassaaq, illoqarfiillu marluk akornanni toqqaannartumik ingerlavigineqartassallutik.
Angalatitsiviit Ruby Rejser aamma Aalborg Lufthavnip Aalborgip Nuullu akornanni aasaqqippat sapaatip akunneranut marloriarlutik toqqaannartumik timmisartuussisalernissamik nalunaaruteqarneranit qaammat qaangiutiinnartoq Air Greenland taama nalunaaruteqarpoq. Taakku timmisartuutileqatigiiffimmit Airsevenimit timmisartumik attartukkaminnik angallassisassapput.
Aasaqqippat Nuup Aalborgillu akornanni sapaatip akunneranut pingasoriarluni timmisartuussisoqartassaaaq.
- Aalborg – Kangerlussuaq, København aqqusaarlugu 2024-mi timmisartuussisarpugut, misissuinerpullu naapertorlugu aqqut atuisunit soqutigineqarluarpoq. Ilaasut amerlasuut toqqaannartumik timmisartuussisoqarnissaa kissaatigisimavaat, Nuullu mittarfiata ammarneqarnerata kingorna aasaanerani timmisartuussinermi toqqaannartumik timmisartuussisoqarsinnaalerpoq, Air Greenlandip pisortaanera, Jacob Nitter Sørensen oqarpoq.
Air Greenland Jyllandip Nuullu akornanni aqqutinut marlunnut timmisartuutileqatigiiffimmit Jettimemit timmisartumik attartorpoq.
Aalborg Lufthavnip pisortaata, Niels Hemmingsenip aqqutit nutaat nuannaarutigai.
- Nuummi mittarfiup nutaap Jyllandip avannaanit Kalaallit Nunaannut toqqaannartumik timmisartortoqarsinnaanissaanut ukkatarinnitsitsinera ersaripput, sunngiffimmimi angalasunut angalanissamut periarfissagissaartitsisorujussuuvoq, inuussutissarsiorneq pillugu angalasorpassuit aamma Kangerlussuarmut aqqusaaqqaarnatik angalasinnaassapput.
Angalasut Island aqqusaarsinnaagaat
Air Greenland Aalborgimiit aqqutip nutaap saniatigut Nuup Billundillu akornanni sapaatip akunnikkaartumik aamma timmisartuussisassaaq.
Aqqut taanna aasaanerani aamma aqqutaassaaq, tassanilu Islandimi Keflavikkimut aqqusaartoqartassalluni.
Tassani Amerika avannarliup, Kalaallit Nunaata, Danmarkillu akornanni angalasut Islandimut aamma aqqusaarsinnaanissaat anguniarneqartoq, Air Greenlandip pisortaata, Jacob Nitter Sørensenip paasissutissiissutigaa.
Billundip Keflavikkillu akornanni aqqut Icelandairip suleqatigineratigut pissasoq, Air Greenlandip paasissutissiissutigaa.
Nuup nunarsuarmilu sumiiffiit allat akornanni aqqutit nutaat Nuummi mittarfiup nutaap 2200 meterinik takissuseqartup ukioq manna novembarip 28-anit ammarnerani periarfissaalissapput.
