Agner Mark Tele-Postimit tunuarpoq
Tele-Postimi pisortaanerit pingasut siulersuisut aaqqiagiinngissuteqarfigineqarnerat pissutigalugu qaammatit kingulliit arfinillit ingerlanerini atorfimminnit tunuarput, tamannalu siulersuisut siulittaasuata Agner Markip maanna kinguneqartippaa.
Allattoq Camilla Dam
Nutserisoq Simon Uldum -
Ingerlatseqatigiiffiup ataatsimeersuarnerani sassarniarani nalunaarpoq.
Michael Binzer pisortaanertut atorfimminit siorna septembarip qaammataani tunuarpoq, tassungalu atatillugu oqaatigaa "siulersuisut siulittaasuata uangalu akornatsinni suleqatigiinniarneq ajorpallaaqimmat, ilami allaat ingasapallaalermat".
Steen Montgomery-Andersenip Binzer kingoraarlugu pisortaagallartussanngortinneqarpoq Per Svendsenilu pisortaanermut tullersortaagallartussanngortinneqarluni. Taakkuli siulersuisunik suleqatigiinniarnikkut ajornartorsiuteqarnera innersuussutigalugu apriilimi aamma tunuarput.
Aamma atuaruk Tele-Postimit tunuarniartut pillugit oqaaseqarusuttoqanngilaq
Taakku marluulluk tunuarnerat pillugu Agner Mark KNR-imit oqaloqatigigatsigu, Tele-Postimi pisortat siulersuisullu suleqatigiinniarnikkut ajornartorsiuteqannginnerarpai.
- Ilisarisinnaavara suliassaqartarmat angumerinngitsuukkatsinnik. Tassanngaanniilli uannut allakkanni allassimasannitut suleqatigiinnermi ajornartorsiuteqarsimasoq ilisarisinnaanngilara, Agner Mark KNR-imut maajip aqqaneq-aappaani taama oqarpoq.
Agner Mark Tele-Postip siulersuisuinut maajimi 2010-mi toqqarneqarpoq 2011-miillu siulersuisunut siulittaasuulluni.