Lynge: Nunarput nettimut saassunneqarnissamut illersuutissaqarnerulissaaq

Nunatsinni qarasaasiatigut saassutsinnissamut illersornissamut tunngatillugu piginnaasat annertunerusut pisariaqartinneqarput.

Taamaammat nunanut allanut tunngasunut naalakkersuisoq, Steen Lynge (D) qarasaasiatigut sillimaniarneq pillugu Danmarkimut sapaatip-akunnerata siuliani isumaqatigiissummik atsiugaqarpoq.

Taassuma atsiornermigut nunatta Illersornissaqarfiup misissueqqissaartarfiata ataani qarasaasiatigut isumannaallisaanermut sullissivimmut tassa Center for Cybersikkerhedimut ilaalernissaa qulakkeerpaa.

- Nunatsinni innuttaasunut ataasiakkaanut, suliffeqarfinnut namminersortunut oqartussanullu qarasaasiatigut saassussisoqarnissaanik allanilluunniit unikaallatsitsinissamik tamanna pilersitsissaaq, naalakkersuisoq oqarpoq.

AAMMA ATUARUK Nunatta Danmarkillu qarasaasiatigut isumannaallisaanissaq isumaqatigiissuteqarfigigaat

Qarasaasiatigummi saassutsinnginnissamut qarasaasiatigut piginnaasat amigaataasimaput. Tamanna Naalakkersuisoqarfiup qarasaasialeriviata qarasaasiatigut 2015-imi saassussinneqarnerani ilaatigut erserpoq.

- Kalaallit innuttaasut oqartussallu illersornissaanut ullumikkut atortorissaaruteqanngilagut. Taamaammat qarasaasiatigut isumannaallisaasoqanngilagut, Danmarkimilu taama aaqqissuussineqarpoq, taamaammallu isumaqatigiissut nunatsinni inunnut ataasiakkaanut oqartussanullu iluaqutaassaaq, Steen Lynge oqarpoq.

Kikkut tusarnaarnersut ernumanartoq

Københavnip Universitetiani ilisimatuujuneq sillimaniarnermullu politikkimut immikkut ilisimasalik, Kristian Søby Kristensen misissueqqissaarnermini tapersiivoq.

AAMMA ATUARUK Naalakkersuisut: Centerip nunarput qarasaasiatigut illersussavaa

- Kalaallit politikeriisa oqaloqatigiinneranni aamma Danmark oqaloqatigigaangamikku kikkut tusarnaarnersut tunngaviusumik ernumagineqartarpoq. Suleqatigiinnermik matumanik pilersitsinikkut attaveqaatit qulakkeerneqassapput, taamaalillunilu isumannaannerusumik oqaloqatigiittoqarsinnaalluni, Kristian Søby Kristensen oqarpoq.

Issittumi qarasaasiatigut saassussisoqarnissaata siooranarnera Canadami Nunavut qarasaasiatigut siorna saassunneqangaatsiarmat aamma naqissuserneqaqqippoq.