Nunatta Danmarkillu qarasaasiatigut isumannaallisaanissaq isumaqatigiissuteqarfigigaat

Danmarkip Kalaallit Nunaatalu akornanni qarasaasiatigut isumannaallisaaneq pillugu isumaqatigiissut atsiorneqarpoq.

Illersornissamut ministeri, Trine Bramsen (S) Hans Egedep Illorsuata saani taama paasissutissiivoq.

Taanna nunatsinnut ulloq ataaseq tikeraaleruttorpoq.

Nunarput taamaalilluni Illersornissaqarfiup Isertortumik misissueqqissaartartuisa ataani Center for cybersikkerhedimut tassa qarasaasiatigut isumannaallisaanermut sullissivimmut ilaalerpoq – isumaqatigiissulli nunatta qarasaasiatigut isertortumik iserfigineqannginnissaanut saassunneqannginnissaanullu qulakkeerutaassaaq.

AAMMA ATUARUK Naalakkersuisut: Centerip nunarput qarasaasiatigut illersussavaa

Isumaqatigiissut Trine Bramsenimit aamma nunanut allanut tunngasunut naalakkersuisumit, Steen Lyngemit (D) atsiorneqaqqammerpoq.

- Qarasaasiatigut isumannaanneq pillugu suleqatigiinnerulernissamut nalunaarut atsiorparput. Qarasaasiatigut isumannaallisaanermut tunngatillugu siooranartoqarnera annertusiartortoq takusinnaavarput, Trine Bramsen oqarpoq.

- Naalagaaffinnit ataasiakkaanillu suliaqartunit saassussisoqartarnera takusarparput. Saassussisullu Kalaallit Nunaannut imaluunniit Danmarkimut nunanulluunniit allanut qanoq inissiinissartik soqutigineq ajorpaat. Taamaammat pitsaasumik qanimut suleqatigiinnissarput soorunami pingaaruteqarpoq. Nalunaarullu una tassunga tunngavoq, Trine Bramsen oqarpoq.

Siooranartut saassussinerillu unitsinneqassasut

Namminersorlutik Oqartussat Center for Cybersikkerhedimut ilanngunnissaanut siunnersuut februaarip ulluisa aqqaneq-aappaannut tusarniaassutigineqarnikuuvoq.

- Center for cybersikkerhed amerlasoorpassuarnik piginnaaneqarpoq. Qanimut siunnersuisinnaassaaq, Kalaallit Nunaatalu misilittakkat ilisimasallu pissarsiarisinnaassavai. Center for cybersikkerhedip assersuutigalugu siooranartut saassussisimanerillu paasisinnaavai taamaalillunilu siooranartut Kalaallit Nunaannut eqquinnginnissaannut aamma suliaqarsinnaalluni.

AAMMA ATUARUK Tele-Postip qarasaasiatigut isumannaallisaaneq annertusaaviginiaraa

- Isumaqatigiissutit uuma paasissutissanik taakkuninnga avitseqatigiissinnaanerput qulakkiissavaa. Ullumikkummi taamaaliorneq ajorpugut.

Illersornissaqarfiup isertortumik misissueqqissaartartuisa nunatsinni qarasaasiatigut siooranartoqarnera qaffasissutut nalilerpaat. Illersornissaqarfiup Isertortumik MIsissueqqissaartartuisa ”Isertortumik Misissueqqissaartartut 2019-imi aarlerinartunik naliliinermi” nalunaarusiaanni Issittoq, pingaartumik USA-p, Kinap Ruslandillu sumiiffimmut soqutiginninnerat pissutigalugu saassunneqarnissamut aarlerinarnerpaamiippoq.

Qarasaasiatigut 2015-imi saassussisoqarnera

Nunatsinnummi Issittumullu politikkikkut soqutiginninneq annertuvoq. Isumaqatigiissummullu aalajangiiffigisassatut siunnersuut ukioq manna marsip ulluisa aallaqqaataanneersoq naapertorlugu pissaanilissuit Danmarkimi sunniuteqarniarsarisimanersut Illersornissaqarfiup Isertortumik misissueqqissaartartuinit suli paasineqarsimanngilaq.

Naalakkersuisummi qarasaasiatigut saassussinerit nunatsinnut aamma aarlerinangaatsiartut aamma paasisimavaat.

Naalakkersuisuisummi qarasaasiaqarfiat qarasaasiatigut saassussisoqarneranik 2015-imi eqqugaavoq, aaqqinniarnerallu sapaatit akunneri marluk tikillugit sivisussuseqarluni.

Canadami Nunavut qarasaasiatigut 2019-imi aamma saassutsingaatsiarpoq.

Danskit umiarsuaatileqatigiiffiat Mærsk A/S aamma suliffeqarfissuaq tusartaatilerisoq Høreapparatkoncernen Demant aamma qarasaasiatigut saassunneqarnikuupput, saassussineq qaangerniarlugu milliardinik naleqarsimavoq.