Abel ukiuni tallimani misiligummik iperagaasussanngorpoq
Abel Klemensenip misiligummik iperagaanissaata ukiuni sisamanik tallimanilluunniit sivisussuseqassanersoq unnerluussisussaatitaasup illersuisullu illuatungeriillutik tunngavilersormassuk nalunaaquttap akunnerinngilaalluunniit.
Abel Klemensen ukiut 25-ngajalluinnaat qaangiuttut toqutsinini toqutseriarninilu pillugit eqqartuussaareerluni Danmarkimi ukiuni killiligaanngitsuni parnaarusimaneqareerluni misiligummik iperagaassasoq, Eqqartuussisoqarfik Kujalleq juunili aalajangerpoq.
Aamma atuaruk Toqutsisimasutut eqqartuussaq misiligummik iperagaalersoq
Unnerluussisussaatitaasuneersup Iben Børgep Abel Klemensenip 1990-imi pinerluutaa "Kalaallit Nunaata oqaluttuarisaanerani toqutserinerit naakkitsaattuliuutaanersaattut" taavaa.
- Pillaatitut toqutsineruvoq. Taamaammat misiligummik iperaanissap ukiunik sisamanik sivisussuseqarnissaanut tunngavissaqanngilaq, unnerluussisussaatitaasoq oqarpoq.
Eqqartuussivimmut sassartoq Narsamiittoq taassumalu illersuisua Thorkild Høyer Københavnimiittoq videokkut tooqqaannartumik attaveqarfigineqarput.
"Pinerlunneq ilungersunarluinnartuusoq" illersuisuata Thorkild Høyerip isumaqataaffigisinnaavaa, oqarlunili Abel nassuersimasoq peqqissimisimasorlu.
Sullissami inuttut ukiut 25-ngajaat matuma siornaniit ineriartorsimanera tikkuarpaa. Illersuisup oqarneratut Abel Klemensen taamani 18-inik ukioqarluni "inuusuttuunerup pianik niaqulaarluni" ajortuliorpoq.
- Parnaarussatut maligassaavoq. Atornerluinini taamaatereerpaa suliffissarsisimallunilu, sulisitsisuatalu iluarisimaarpaa, Thorkild Høyer oqarpoq.
- Iperagaanissamut misilinneqarnerata ukiunit sisamanit sivisunerunissaanut suna tunngaviussanersoq takujuminaatsippara. Soorluuna qupaloraarsuit qamutilinnik issunneqartut, Thorkild Høyer nangippoq.
Taamalu tunngavilersuinera Nunatta Eqqartuussisuuneqarfiata tassa isumaqatigaa.
Abel Klemensen pinerluttunik isumaginnittoqarfik naapertorlugu kalaallini piffissaligaanngitsumik sivisunerpaamik paarnaarussaavoq.
Misiligummik iperagaanissami ukiunik tallimanik sivisussusiligaanera eqqartuussaasup tusaatissatut tigugaa, illersuisoq Thorkild Høyer KNR-imut ilisimatitsivoq.
