Aavarneq akisunerusariaqarpoq
Storm Ludvigsen isumaqarpoq, pinialuttartut Nunatsinni ima amerlatigilersut, piniartunut inangeeqqajaasutut isumaqarfiginarsinnaallutik.
Assersuutitut taavaa, inoqutigiinni saniatigooralugu piniarnissamut allagartallit arlaliuppata, soorlu pingasuullutik, tamarmillu tallimanik immikkut tuttutassinneqarunik, katillugit 15-inik tuttussinnaalissasut. Taamaalilluni inuussutissarsiutigalugu piniartup tuttunik tunisinissaminut periarfissai annikillisinneqarlutik.
Storm Ludvigsenip siunnersuutigaa saniatigooralugu pinialuttartunut tuttunik tallimanik pisassiineq assersuutigalugu 1.000 koruuninik akeqartinneqalersinnaasoq.
Akiliisitsinerusalernissap kisitsisitalerneqarnerani eqqarsaatigineqarput allaffissornikkut sunniutissai, aamma inuussutissarsiutigalugu piniartunut iluaqutissarisinnaasai.
Storm Ludvigsenip saniatigooralugu pinialuttartutut allagartallit Nunatsinni qassiunersut Naalakkersuisunut ilanngullugu apeqqutigaa.