Aatsitassarsiornermut inatsimmi allannguutissatut siunnersuut aporfeqartoq
Aatsitassarsiornermi aaqqissuussaanerup iluani, siunnersuutigineqartoq paasiuminnaatsinneqarlunilu inatsisitigut isumannaatsuunissamik qulakkeerinnittuunngitsoq, peqatigiiffiit nunatsinilu eqqartuussissuserisut isumaqarput.
Tassa tusarniaassutini Naalakkersuisunut uparuaatigineqartut ilaminiinnannguaraat.
Siunnersuutigineqartut aallaavigalugit, maalaarsinnaaneq killeqalerlunilu aatsitassanut avatangiisinullu suliassaqarfiit ataatsimuulersinneqarnissaat isornartorsiorneqarpoq. Taannaannaanngilarli.
Aamma atuaruk Aatsitassanut inatsisissamut akerliusut amerliartorput
Namminersorlutik Oqartussaqarfiup Avatangiisinut Naalakkersuisoqarfiata aatsitassanut avatangiisinullu suliassaqarfiisa ataatsimuulersinnissaat uggoraa. Pissutissaqartorli oqaatigineqarpoq.
Nunani allani malittassat naapertorlugit Kalaallit Nunaata sulinissaa, oqartussanillu suliassanik tigusisartut ilisimasaqarluartuunissaat siunertaavoq, Avatangiisit pillugit immikkoortortaqarfimmi pisortaq, Karen Anne Arleth allappoq.
Aatsitassanut avatangiisinullu suliassaqarfiit inatsimmi ersarissumik immikkoortinneqarnissaat suli atuuttariaqarpoq, suliassaqarfiillu immikkoortinneqarnerat inatsisinik allannguuteqartitsinermi ersarissarneqarnissaat, Avatangiisinut Naalakkersuisoqarfiup naatsorsuutigaa.
Aamma atuaruk Aatsitassanut inatsisissaq suliniaqatigiiffinnit ilalerneqanngitsoq
Inatsisitigut isumannaatsumik qulakkeerinninnissaq ajorseriarlunilu aatsitassatigut oqartussanit maalaarsinnaassuseqarnissaq Nalakkersuisunit atorunnaarsinniarneqarmat, nunatsini eqqartuussissuserisut aallapput.
Kommuneqarfik Sermersooq KANUKOKA-lu siunnersuummi arlalinnik apeqqusikkaminnik tikkuaapput.
- Aatsitassanut akisussaaffiit oqartussaaffinni sorlerniinnersut ersarissartariaqarput, taamaanngippallu avataanit aningaasaliisussarsiniarneq ajornarnerulissaaq, KANUKOKA tusarniaanermut akissuteqarluni allappoq.
