Aatsitassanut inatsisissaq suliniaqatigiiffinnit ilalerneqanngitsoq
![](/sites/default/files/styles/image_934x467/public/article_images/img_2466.jpg?itok=GR9cjP1a)
- Aatsitassanut suliassaqarfiit pillugit sulianik isertuussinerulernermik kinguneqartussangussasoq isumaqarpugut, WWF-imeersoq, Kaare Winther Hansen oqarpoq.
Avatangiisinut aatsitassanullu suliassaqarfiit ataatsimuulersinneqarpata
aatsitassarsiorneq siuarsaavigineqalissasoq, naalakkersuisut isumaqarput.
Inatsilli allanngortinneqassappat allagaatinik takunnissinnaatitaajunnaartoqarlunilu - suliat qanoq suliarineqarnersut ersarissumik takuneqarsinnaajunnaarnissaat, suliniaqatigiiffiit isumaqarput:
- Suliassaqarfiit ataatsimuulersinneqarpata, suliat pillugit innuttaasut, suliniaqatigiiffiit politikkikkullu illuatungiliuttut allagaatinik takunnissinnaajunnaartussanngussapput,
suliallu kukkusumik suliarineqarsimanersut takuneqarsinnaajunnaassallutik,
tamannalu kinguariarnerussaaq, Kaare Winther Hansen nassuiaavoq.
Innuttaasut eqqorneqassasorineqartut
- Siunnersuut saqqummiunneqartoq nangaanartulerujussuuvoq, paasissutissat killilersuiffigineqalissapput, aamma Naalakkersuisut innuttaasut sunniuteqaqataanissaannik oqariartuuteqareerlutik massakkut muminganik siunnersuuteqarput, ICC-mi præsidenti, Hjalmar Dahl oqarpoq.
Inatsillu nutaaq atulissappat ammanerulersitsisoqarnavianngimmat, Transparency Greenland isumaqarpoq. Aatsitassanut inatsisissap allannguutissaa pillugu eqqartuussissuserisoq Transparency Greenlandimit misissuitinneqarsimavoq.
- Allannguutissatut siunnersuummi kukkuneqangaarmat amigaateqangaarmallu
siunnersuut tunuartinneqartariaqaraluarpoq. Akuerineqassappammi suliat pillugit
ammanerulersitsisoqarani isertuussinerulersitsisoqassaaq, taamaattumillu nutaamik inatsisiliortoqartariaqarpoq, WWF-imeersoq, Kaare Winther Hansen KNR-mut oqarpoq nangillunilu:
- Naalakkersuisut suliaq pillugu tamaviaarussillutik suliarisariaqarpaat.
Aatsitassanut inatsisissamut atatillugu sisamariarluni maannamut allannguisoqareersimalerpoq.
Avatangiisinut Aatsitassanullu suliaqarfiit 2012-imi immikkoortinneqaleraluarput, inatsilli nutaaq atuutilissappat avatangiisinut aatsitassanullu ataatsimuulersinneqarpata aatsitassanut oqartussanut ataatsimoortinneqalissapput.