Kommune Kujalleq: Aatsitassarsiornermi piumasaqaatit sakkukillisissigit

-Aatsitassarsiornermik ingerlataqartunut kiinnertarnitsinni piginnaaneqarnerusariaqarpugut tatiginarnerusariaqarlutalu, tamannalu pisinnaasariaqarpoq alliffissorujussuarnermik pilersitsisoqanngikkaluarluni, borgmesteri Siumumeersoq tusagassiorfinnut nalunaarummini ilaatigut taama allappoq.

Aamma isumaqarpoq maannamut periuserineqartoq, tassalu aatsitassarsiorniartunut suliarinneqqaarfissanik pilersitsinissamik piumasaqaateqartarneq tamatigut napertuuttuaannanngitsoq nassuerutigisariaqartoq. Piviusorsiortumik siunnerfilimmillu iliuuseqartoqarnissaa amigaatiginerarpaa, tamanna Kujataata ingerlateqqinnissaanut amigaatigineqaqisutut nalilerlugu.

AAMMA ATUARUK Tanbreezimut isumaqatiginninniarnerit unittooqqasut Wæverip utaqqisinnaajunnaarai

Parteeqataa borgmesteritullu siulerisaa, Jørgen Wæver Johansen, aatsitassarsiornerup silarsuaani inuussutissarsiornikkut ineriartortitsisoqarnissaanik kissaateqartut aamma ilagisimavaat:

Novemberip 26-ani 2015-imi taama oqarpoq. Taamatuttaaq ilisimatuut arlaannaannulluunniit pituttorsimanngitsut, suliffeqarfiit kiisalu piginneqatigiiffiit inatsisit malillugit Naalakkersuisut akuersiteqqaarlugit isumannaatsumik ingerlatsisoqarsinnaaneranik uppernarsaasinnaanissaat pingaartippaa.

Kiista P. Isaksenili isumaqarpoq ineriartortitsisoqassappat piumasaqaatit sakkukillisinneqartariaqartut.

Suliniut Tanbreez ukiuni tallimani nikeriarsimanani utaqqisoq kiisalu suliniut Kuannersuarnut tunngasoq qinnuteqaatip tunniunneqarneraniit pisortanit suliarineqarnerata sivisussusaata ullut 1.300-t qaangereersimaleraat tikkuarpai, pissutsillu taamaanneranni siunissami qaninnermi aatsitassarsiornermik aallartitsisoqarnissaa pillugu aalajangertoqarnissaanik isikkoqanngitsoq.

-Tassani ersareqaaq Kalaallit Nunarput nuanut sanillersuuffiginiartakkatsinnut sanilliullugu unammillersinnaassuseqanngitsoq, borgmesteri oqarpoq.