Aatsitassarsiorneq pillugu politikkikkut aalajaatsumik ingerlatsisoqalernissaa GA-p piumasaraa
GA-p pisortaa Brian Buus Pedersen isumaqarpoq piffissanni Nunatta politikkikkut patajaassusermik aatsaat taama pisariaqartitsiffiani aningaasaliisartullu sinaakkutanik siulittoruminartunik pisariaqartitsiffiini, Sara Olsvigip aviisimut Politikenimut ersernerluttumik akinera, aatsitassarsiortitseqatigiiffinnut aningaasaliisartunullu nalornilersitsissasoq.
- Inatsisartuni partiit tamalaanit aalajangersaasarnissaasa pingaaruteqassusiat, Sara Olsvigip aviisimut oqaasiisa erseqqissisippaa. Uranimut naaggaarluinnarnerup atorunnaarsinneqarnera partiinik tamalaanik tunuliaquteqanngilaq, pisorlu tamanna sangusajaartumik politikkeqarnissamut tunngaviliivoq, GA-p pisortaa allappoq.
Aamma atuaruk Olsvig: Kuannersuarni aatsitassarsiortoqalissappat IA-p akerlilersornavianngilaa
Taassumalu aatsitassarsiorneq pillugu paatsiveerusimaarneq, royaltinik akiliuteqartarnissamik piumasaqarnermigut Siumup qineqqusaarnermi matuma siuliani pilersitaa eqqaasitsissutigaa.
- Taama ersernerlutsigisumik siunnerfeqarnikut inuussutissarsiornikkut pilersaarutit isumalluarnaraluartut qatagiinnarsinnaasut, Brian Buus Pedersen isumaqarpoq.
Politikkikkut ingerlatsinerup patajaatsuunnginnarnissaa, taassuma aarleqqutigaa.
- Taamaaginnassappat, suliffissarpassuarnik pisariaqarteqisatsinnik pilersitsisinnaasunik miliardilikkaanik aningaasaleerusuttunut tatiginassuseqalernavianngilagut, GA-p pisortaa naggasiivoq.
IA GA-mut isumaqataanngilaq
Sara Olsvig Politikenimut oqaaseqarnermigut nunatta atsitassanut politikkianik nalornititsinngitsoq, parteeqataa Aqqaluaq B. Egede allappoq.
- IA-p aatsitassanut politikkia danskit aviisiisa saqqaanni aalajangersarneqarneq ajorpoq. IA-miit oqaluinnaavippugut, uranimut naaggaarluinnarnerup taamaatitinneqarnerani periutsit aatsitassanut politikkimi patajassusermik pilersitsinngitsut, IA-p siulittaasuata tullia allappoq.
- Politikkikkut patajassusermut aqqut innutaasumik, kattuffinnik aatsitassarsiortunillu peqataatitsinermiippoq. Taakkuninngalu oqaloqatiginninnissamut piareersimavugut, Aqqaluaq B. Egede allappoq.