Aatsitassanut pisortaqarfik pissaaneqarpallaarpoq

Cairn Energy-p aasaanerani qillerineri pillugit oqallinnerit assigiinngitsut pisut pillugit Aatsitassanik pisortaqarfiup sulinera pillugu Naaja Nathanielsen apeqquteqaat aallaavigalugu oqallisissianik marlunnik siunnersuuteqarpoq.

Siulleq Aatsitassanut Pisortaqarfik allaffissornikkut kisimi suli oqartussaassuseqarnissaanut, imaluunniit immikkoortortanut arlalinnut naligiimmik oqartussaassuseqartunut agguataarneqassanersoq tunngassuteqarpoq. Soorlu imaalillugu avatangiisinut tunngassutilinnut immikkoortortamik pilersitsinikkut, Naaja Nathanielsen oqarpoq.

- Isumaqarpunga, qinnuteqaaatinik tigooqqaasartut suliarinnittartut isornartorsiorsinnarlugillu Naalakkersuisunut inassuteqaateqartartut, tamatumalu kingorna malitseqartitsisartut ataatsimut katersorneqarsimanerat ajornartorsiutaasoq. Tamanna ajornartorsiortitsilersinnaavoq, Naaja Nathanielsen oqarpoq.

Aatsitassanut pisortaqarfiup marloqiusamik inissisimanerata ajornartorsiutaanera, aamma suliniaqatigiiffinnit ICC-mit, Avataq-mit aamma Greenpeace-imit ilaatigut aamma uparuarnikuupput.

Tassungalu atatillugu pisortaqarfiup, qillerinissamut akuersissuteqarnissaq sioqqullugu avatangiisit pillugit sulinermi avatangiisit pillugit piumasaqaatinik annikillilerisimanera pillugu, sukkavallaamik suliamik ingerlatsisimanera inuillu akuutinneqanngippallaarnerat pillugu Aatsitassanut pisortaqarfik pasillerneqarpoq. Tassaluuku tamakku isornartorsiuinerit Naaja Nathanielsenimit naaperiarneqartut.

- Oqaatigisarparput avatangiisinut tunngasortai nakkutilliinertulli pingaaruteqatigisoq, soorlu aamma  aningaasalersuinissamut tunngassuteqartut taama isigigivut, Naaja Nathanielsen oqarpoq.

Apeqquteqaat tunngavigalugu oqallisissiap aappaa parteeqatinilu Juliane Henningsen saqqummiutaat tassaavoq, uuliasiorsinnaanissamut akuersissutit tunniunneqaraangata Inatsisartut siunissami akuutinneqartarnissaannut tunngassutilik. Tassami Namminersorneq eqqunneqarmalli Naalakkersuisut kisimiilluinnarlutik akuersisartuusimapput.

- Isumaqarpunga kikkulluunnit pissaanermik tigummiaqaraluarpata tusarniarneqartussat sapinngisamik tusaaniarneqarnissat pisariaqartoq, tamannaluunnit piffissartornarnerussagaluarpat, Naaja Nathanielsen oqarpoq, uuliasiorneq pillugu aasap ingerlanerani oqallinnermi arlaleriarluni Naalakkersuisunik Aatsitassunullu pisortaqarfimmut isornartorsiuisimasoq.

- Misilittagarilikkagut ilinniarfigisariaqarlugit isumaqarpunga, pitsaanerusumillu siumut isigisumik suliaralugit, Naaja Nathanielsen oqarpoq.

Ilanngullugulu isummersuutini Naalakkersuisuni illuatungiliuttunilu tapersersorneqarluartut oqaatigaa.

Apeqquteqaat aallaavigalugu oqallisissiat marluusut Inatsisartuni novembarip arfineq-pingajuanni oqallisigineqassapput.