Aatsitassanut naalakkersuisoq isumalluarpoq
Politiken arfininngormat allaaserisaqarpoq, immikkut ilisimasallit arlaqartut aatsitassarsiortoqarsinnaanera taamaatiinnarnerarlugu oqaaseqartillugit. Kalaallit Nunaanni piffissaq manna atorfillit, aatsitassarsiortut immikkullu ilisimasallit suna pissutiginerlugu qularinnilernerisa siammariartorneranni.
Københavnip Universitet-iani Professori Minik Rosing, allaaserisami oqarpoq piviusorsiornerpaasoq ukiut 20-it 25-illuunniit qaangiuppata aatsitassarsiortoqalernissaa.
Aatsitassaqarnermut naalakkersuisoq Jens-Erik Kirkegaard isumaqarpoq aatsitassarsioqatigiiffiit tamakkunanngalu ujaasisartut kisimik aalajangersinnaangaat qaqugu aallartissanerlutik.
Pilersaarutinut qulartoqartuaannassaaq, Jens-Erik Kirkegaard oqarpoq. Namminermi ukiut marluk sisamalluunniit qaangiuppata aatsitassarsiortoqalersinnaassasoq ilimagaa. Pisut assigiinngitsut patsisigai:
Jens-Erik Kirkegaard-ip aatsitassarsiornissamut isumalluarneranut pissutaasunut ilaapput qinnuteqaateqartoqarsimanera. Aammalu Kalaallit Nunaat iluaqutissaqarmat. Aatsitassat sinerissamut qanittumiipput, imaappoq qimuttuitsut aqqutaat, paramminilluunniit ikaassuinerit pisariaqassanngillat. Aammalu Kalaallit Nunaat eqqartuussiveqarpoq, inuiaavugut inuit inatsisitigut illersugaanerannik pingaartitsisut, tamat oqartussaaqataapput, isumaqatigiissutinillu ataqqinnittartut.
Isukasia Nuup kangerluani savinissarsiorfiusussaq piiaanissaminut qinnuteqaateqareerpoq, Tunup Avannaarpiarsuani Citronenfjord-imi zinkimik piiaanissamut aappaagu qinnuteqartoqassamaarpoq, aatsitassat qaqutigoortut Kujataani Killavaat Alannguaniittut piiarneqarnissaannut aasaq naatinnagu qinnuteqassagunarput, aamma Qeqertarsuatsiaat eqqaani rubin-inik piianissamut qinnuteqartoqarnissaa naatsorsuutigineqarpoq.
Eqqartukkavut Qanoruumi unnuk manna sammineqartussaapput, ilaatigut Nuna Minerals-ineersoq Ole Christiansen Politikenimi allaaserineqartumi Minik Rosing-imut isumaqataasoq.