Aatsitassanut akitsuusiinnissaq Atassutip ilalerpaa

Atassutip qinersisartunit tapersersortikinnera partiip ukiortaami oqaaseqaataani nassuerutigineqarpoq. Uranimut naaggaarluinnarsimanerup atorunnaarsinnissaa maanna piumasaraat.
Allattoq Noah Mølgaard
januaarip 02-at 2013 11:29

Immikkut ilisimasallit maanna misissuiffigisussanngorpaat uranimut naaggaarluinnarsimaneq atorunnaassappat sunik kinguneqarsinnaanersoq. Taamaattoq tamanna pillugu Atassut isummereerpoq.

- Aatitassarsiorneq annertusarsinnaaqqullugu aammalu inuiaqatigiinnut kalaallinut annerpaamik iluaqutaasinnaaqqullugu uran-imik akoqartut akoqassutsimikkut killiliivigineqarnissaat ukiuni aggersuni sulissutigineqartariaqarpoq, isumarpullu malillugu naleqqussinnaavoq EU-mi piumasaqaatit maleruarlugit aalajangersaasoqarnissaa, Atassutip siulittaasua Gerhardt Petersen ukiortaami oqaaseqaammini allappoq.

Aatsitassat nunatsinniit annissorneqartut akitsuusertalernissaannik piumasaqartunut Atassut aamma ilannguppoq.

- Taamatuttaaq inuiaqatigiit Kalaallit aatsitassarsiornermit uuliasiornermillu annerpaamik pissarsinissaat siunertaralugu, naapertuilluarnerussaaq aatsitassat qallorneqartut aammalu nunatsinnit annissorneqartut naapertuuttumik minnerpaaffilliiffeqartumillu akilersorneqartarnissaat aalajangiiffigineqarnissaat, Gerhardt Petersen oqarpoq.

2013-mi inatsisartunut kommunalbestyrelsenullu qinersisoqartussaavoq Atassullu qinersinerni arlariinni kinguariartarpoq.

- Uagut ATASSUT-mi killiffipput nalilissagutsigu, piffissami matumani inissisimavugut Naaalakkersuisunut tatiginninnerput annertunerusinnaalluni, tassaniimmat naalakkersuisuutitaqartunut arlalitsigut nikingaasoorfeqarneq pakatsiffeqarnerlu. Taamaattorli Atassut-mi piumassuserput ingerlariaqqinnissamullu nukeqassuserput tamanna pillugu annikinnerulinngilaq, paarlattuanillu nalimmassaaqataanissamut nukittunerunissarput pigilerneroriaannaqqallugu, Gerhardt Petersen oqarpoq.

- Ilisimaaraarput piffissami aggersumi, ukiumilu nutaami marloriarluta qinersiffiusussami annertuumik suliassaqarluta paasisimalluarparput - inuiaqatigiit kalaallit uagutsinnut politikkikkut suliaqartuusunut tatiginninnerat annertusassallutigu, tamannalu tamaviaarluta sulissutigaarput, tamanna qularineqassanngilaq. Piumassuseqarpugut nukissaqarluarlutalu siunissami unammilligassat annertuut pissanganarlullu suleqataaffigissallugit  aamma 2013-mi naammattuugassagut aqqusaagassagullu, Gerhardt Petersen oqarpoq.