Aasianni peqqissaasut ikioqqupput

novembarip 23-at 2006 06:29

Nunatsinni peqqinnissaqarfimmi pissutsinik ajorluinnartunik pitsanngortitserusunnitsinni ikiortigut. Peqqissaasut akissaataat pillugit peqqissaasut peqatigiiffiata Namminersornerullutillu Oqartussat isumaqatigiinniarnerisa unittooqqanerat aallaavigalugu, Aasianni peqqissaasut pisortanut ammasumik allagaqarlutik taama saaffiginnissuteqarput.

Aasiaat peqqissaavianni peqqissaasutut ilinniarsimasunut atorfiit 14-iugaluartut, peqqissaasutut sulisorineqartut ullumikkut qulingiluaannaapput.

Aasianni napparsimmavimmi uninngavimmi peqqissaasut siornagut arfiniliugaluartut maannakkut marluinnaapput, piffissamilu sivikitsumi pingasuusarlutik.

Aasiaat peqqissaavianni peqqissaasunik amigaateqarnerujussuaq Aasiaat pigisaanni tamarmiusumi kiffartuussiniarnermut eqquisoq, peqqissaasut allapput.

Peqqissaasut peqatigiiffiata Namminersornerullutillu Oqartussat akissaatit pillugit isumaqatigiinniarnerisa ajalusoornerat Aasianni peqqissaasut naammaginngilluinnarpaat.

Peqqissaasut akissaataasa qaffaatissaattut Namminersornerullutik Oqartussat neqeroorutaat, pisiassat akiisa qaffakkiartornerannilluunniit appasinnerusoq, tamannalu atorfinitsitsiniartarnerup ajornarnerulerneranik, taamalillunilu peqqinnissaqarfimmi pissutsit pitsaajunnaavinnerannik kinguneqartussaq, Aasianni peqqissaasut ikioqqullutik allagaqarnerminni tunngavilersuutigaat.