Aasiaat: Tunillanneqarsimasoq sapaatip akunnerata siuliani imerniartarfinniissimasoq
Aasianni aqunneqarsinnaannginnerusumik tuniluuttoqarnerunissaa ernumassutigineqarpoq. Aasianni tunillatsissimasut maanna aqqaniliupput.
Tunillatsissimasoq ataaseq tallimanngornerup arfininngornerullu akornanni imerniartarfinniissimasoq maanna paasineqarpoq.
Imerniartarfiit pineqartut tassaapput Nanuaraq, Nanoq aamma Tulugaq.
Taamaammat tunillatsissimasunik suli paasineqanngitsoqarsinnaanissaa oqartussat ernumassutigaat.
AAMMA ATUARUK Tunillanneqarsimasut arfineq-pingasut: Aasianni meeraaqqerivik matusoq
- Innuttaasut tamarmik piffissap taaneqartup nalaanni imerniartarfinniissimasut (Nanuaraq, Nanoq aamma Tulugaq) misissortinnissaat piumasarineqarpoq, tassani tunillatsissimarartarsinnaanerat peqqutaalluni, Nakorsaaneqarfik tusagassiuutinut nalunaarummi allappoq.
Qaqortumi juulip qiteqqunnerani assingusumik pisoqarpoq.
Tassani tunillatsissimasoq imerniartarfimmi, Rockhousemi tallimanngornermi juulip qulingiluaani tusarnaartitsisuniissimavoq.
AAMMA ATUARUK Inuit 250-t misissortissasut: Qaqortumi tunillatsissimasoq nipilersortunik tusarnaariarsimasoq
Tamanna pissutigalugu inuit 250-it missaanniittut covid-19-imut misissortipput. Misissuisoqarneranilu tunillatsissimasut allat pingasut paasineqarlutik.
Aasianni meeraaqqeriviit Kulloq Vâvalu angajoqqaat akornanni tunillatsissimasoqarsinnaanera ilaatigut ilimagineqarmat matoqqapput.
Sulisut tamarmik angerlartinneqarput misissortillutillu.