Tunillanneqarsimasut arfineq-pingasut: Aasianni meeraaqqerivik matusoq
Upernavimmi tunillanneqarsimasumik ataatsimik nassaartoqaqqippoq, tamaani tunillanneqarsimasut arfineq-pingasooreerput.
Tunillanneqartoq coronaviruseqartunut ilisimaneqareersunut attaveqarsimavoq, taamaammallu misissorneqarnerminiilli angerlarsimaannarluni.
Aasianni arfineq-marluk tunillanneqaqqammerput. Tamaani sisamat coronaviruseqareerput, tunillanneqarsimasullu amerlassusaat massakkut aqqanilliullutik.
AAMMA ATUARUK Corona pissutigalugu killilersuinerit Upernavimmi Aasiannilu atuutiinnassasut
Aasianni tunillanneqarsimasut tallimat inoqutigiinni ataatsineersuusut, Namminersorlutik Oqartussat tusagassiuutinut allapput.
Taakku nukarlequtertik Aasianni meeraaqqerivimmukaasimavaat. Tunillanneqarsimasullu sisamanngornerup unnuaani coronavirusimik ersiuteqalersimasut, Namminersorlutik oqartussat allapput. Meeraaqqerivimik matusisariaqalernermik kinguneqartumik.
- Taamaattumik nalunartut pillugit kommune attavigineqarsimavoq, meeraaqqeriviup matuneqarnissaa kiisalu pisut pillugit meeraaqqerivimmiittuutillit angajoqqaat ilisimatinneqarnissaat qulakkeerniarlugu, Namminersorlutik Oqartussat allapput.
Tuniluunermik misissuineq
Upernavimmi Aasiannilu tunillanneqarimasut tamarmik angerlarsimaanaqqusaapput, tuniluusimanermillu misissuisoqaleruttorluni. Tunillanneqarsimasunut qanillisimasut Coronap allattoqarfianit oqarasuaatikkut saaffigineqassapput, ulluni arfineq-marlunni angerlarsimaanaqquneqassallutik, ulloq arfineq-marlussaanilu misissorneqaqquneqassallutik.
- Qanimut attaveqarsimasut attaveqarnerminniit ullut 14-it tikillugit COVID-19-imut ersiuteqalernerlutik eqqumaffigeqqissaassavaat. Ullut arfineq marlussaanni misissortinnermi tunillatsissimanngitsutut inerneqaraluarpalluunniit mianersornissaq suli atuutissaaq, ersiuteqalernerlunilu eqqumaffigalugu.
