Aasaru RAL-ip umiarsuaataata naggataarluni Aalborg qimassavaa
Tukuma Arctica umiarsuarni ingerlaarfimmi aappaaluttumi kingullersaalluni Aalborgimit pingasunngornermi juunip 22-ani 2022 aallassaaq.
Siunissami Royal Arctic Linep umiarsuaatai Danmarkimi umiarsualivimmut ataatsimut tulattalissapput, tassa Aarhusimi.
Umiarsuaatileqatigiiffiup umiarsualiviup aqqusaartakkami Århusimut siunissami nuunnissaa 2017-imiilli nalunaarutigaa, nunarsuup sinnerani assartuinikkut attaveqatigiit sinnerinut pitsaanerusunik attaveqalernissaq qulakkeerumallugu.
AAMMA ATUARUK RAL-ip umiarsuai Aarhusimut tulattalissapput
Islandimiut umiarsuaatileqatigiiffiat Eimskib suleqatigalugu tamanna pivoq.
- Umiarsualiviit aqqusaartakkat amerlanerusut pitsaanerusumillu atassuteqartut malitsigisaannik sullitavut niuernissamut amerlanerusunik periarfissaqalissapput, niuertullu sullissisunik amerlanerusunik toqqagassaqalissallutik, Royal Arctic Line tusagassiuutinut nalunaarumi allappoq.
Aalborg-imut inuulluaqqusineq pisariusoq
Aalborgip Umiarsualivianik isumaqatigiissut atorunnaarsinniarlugu ingerlatsinerlu Aarhusimut nuunniarlugu Royal Arctic Line nalunaarmat aalassattoqarpoq.
Siullermik nalunaarutigineqarpoq RAL-ip Aalborg 2019-ip qeqqani qimanniaraa, naak umiarsuaatileqatigiiffik umiarsualivillu 2022-p tungaanut isumaqatigiissuteqaraluartut.
Taamaattumik atorunnaarsitsiniarneq Aalborgip Umiarsualivianit koruuninik 200 milliuuninik taarsiiffigeqquneqarnermik kinguneqarpoq.
AAMMA ATUARUK Aalborgip umiarsualiviata Royal Arctic Line tatiniarsarigaa
- Taamaattumik piffissaritaasoq pillugu isumaqatigiinniarsinnaanngilagut isumaqatigiinniarumanatalu. Isumaqatigiissut isumaqatigiissutaavoq, Aalborgip borgmesteria Aalborgillu Umiarsualiviata siulersuisuni siulittaasoq Thomas Kastrup Larsen (S) 2016-imi oqarpoq.
Kingusinnerusukkut periaaseq allanngorpoq, illuatungeriit taarsiullugu isumaqatigiinnialerlutik 2022-ip kingornatigut Aalborgip Umiarsualivianut tikittarnissaq – immaqa 2025 tikillugu – pillugu. Kisianni isumaqatigiinniarnerit isasoorput.
Tassali taarsiullugu aasamut Aalborg naggataavimmik inuulluaqquneqassaaq.
Siunissami tunniussisarfissat aallertarfissallu pillugit paasissutissat marsip qaammataata naannginnerani nalunaarutigineqarnissaat naatsorsuutigineqarpoq, Royal Arctic Line paasissutissiivoq.
