Aasakkut sulinngiffeqarnerit Qaqortumi mittarfissualiassamut pilersaarutinut kinguartitsisoq
Mittarfiit aningaasaqarniarnerisa nutaamik misissoqqissaarnerinit inerniliinerit atorlugit, ilaatigut Qaqortumi mittarfiliassaq aaæajangiiffigineqassasoq pilersaarutaavoq.
Maannakkummi mittarfiliariniagaq suli qulakkeerneqanngilaq, piviusunngorsinnaanissaalu suli ilisimaneqarani.
Mittarfiliortiterneq
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Misissueqqissaarnernilli Naalakkersuisut aallatitaannit inerniliinerit, politikkikkut aalajangiinissanut tunngaviusussat, aggustip naalernerani imaluunniit septembarip aallartinnerani naammassinissaat ilimagineqartoq, Attaveqaqatigiinnermut Naalakkersuisoq, Naaja Nathanielsen IA-meersoq nalunaarpoq.
AAMMA ATUARUK Naalakkersuisut Qaqortumi mittarfimmit allamik qinigassaqarnissamut periarfissaqartitsisut
- Sumiiffinni assigiinngitsuni aasaanerani sulinngiffeqarnernik eqqugaanikuuvugut. Kisiannili paasitinneqarpunga, misissueqqissaarnermit inerniliinerit sapaatip akunnerata ingerlanerani takusinnaassagikka, taanna KNR-imut oqarpoq.
Manna tikillugu qulaajaasoqarnerani paasineqarnikuuvoq, mittarfiliassat naatsorsuutigisanit annertunerujussuarmik akeqarnissaat. Misissueqqissaarnerit marluk Naaja Nathanielsenip aallartitai pillugit inerniliinissat suli amigaataapput.
Nalunaarusiat aappaat tassaavoq, 2018-imi Deloitte-p nalunaarusiaa nutartigaq, aappaalu tassaalluni Qaqortumi mittarfiliassaq pillugu nalunaarusiat, sulilu taakkua naammassiniarlugit ulapputtoqartoq, Naaja juulip 12-anni KNR-imut nassuiaavoq.
- Naatsorsuinissamut tunngavissat nutaat píneqarput, taakkualu sukumiinerusumik eqqaasinnaanngikkallarpakka. Neriorsuutigissavarali, taakkua naammassippata uninngatiinnarnaviarnagit, Naaja Nathanielsen 12. juuli oqarpoq.
Innuttaasut ataatsimiitinneqarnerinut atatillugu kommunalbestyrelse ataatsimeeqatigineqarpoq
Taamaammat 900 millionit koruuninik akisunerusoq:
Oqartussanit sanaartornermut illunullu atatillugu piumasaqaateqartoqarnerulerneranik aningaasartuuteqarneruneq. Taakku tassaanerupput Angallannermut aqutsisoqarfimmit avatangiisinut piumasaqaatinut sukannernerusumillu piumasaqaateqarneq.
Nalunaajaat naapertorlugu piumasaqaat taanna ”missingersuusiarineqaqqaartumi ilisimaneqarsinnaasimanngilaq, piumasaqaat pilersaarutip inaarsarneranut atatillugu aatsaat paasineqarmat”.
Mittarfinni illut aallaqqaammulli suliniutip ilaaniipput. Misissingersuutilli naammanngitsut paasineqarpoq. Nalunaajaat naapertorlugu ”illut mittarfiup nalinginnaasumik ingerlanneqarnissaanut nunallu tamalaat akornanni angallannermik aqutsinissamut tunngatillugu pisariaqartut pineqarput. Tamatuma saniatigut pilersaarutigineqaqqaartumut inersuarmik sanaartortoqarnissaa ilanngunneqarpoq."
Katillugit 747, 2 millionit koruunit.
Tamatuma saniatigut ingerlatsinermut aningaasartuutit: 142,5 millionit koruunit.
Aamma saniatigut aningaasaliinermut aningaasartuutit: 6 millionit koruunit.
Katillugit: 895,7 millionit koruunit.
Kommune Kujallermi kommunalbestyrelsep Qaqortumi mittarfiliassap aalajangiiffigineqarnissaa piumasaraat. Piaartumik.
Tamannali aatsaat pisinnaavoq, qaammatip naalernerani Kuannersuit pillugit Naalakkersuisut Kujataanukarpata.
- Taamanikkussamut taava kommunalbestyrelse sinniisuutitallu ilisimasannik oqaluttuukkumaarpakka, Attaveqarnermut Naalakkersuisoq, Naaja Nathanielsen, oqarpoq.
- Paasissutissat pigisakka tamaasa saqqummiutissavakka, arlaannillu sulitakkunnikuunngitsunik pilersaartoqarpat, taakkua aamma pillugit soorunami paasissutissiisoqassaaq. Suut pilersaarutaanersut taakkununnga ingerlateqqissavakka, taavalu taakkua qanoq oaasissaqarnersut eqqarsaateqarnersullu paasiniassallugit, taakkuami paasinissaat uanga aamma soqutigigakkit.
AAMMA ATUARUK Mittarfiliornerit: Aningaasat asfaltimut atorneqartut inunnik isumaginninnermut atorneqarsinnaagaluarput
Naaja Nathanielsen-ip Aningaasaqarnermut Naalakkersuisoq, Asii Chemnitz Narup (IA) peqatigalugu, mittarfiliassanut aningaasartuutissat qulaajarneri juunimi saqqummiuppaat.
Tassani saqqummiunneqarpoq, Nuummi Ilulissanilu mittarfiit naatsorsuutigisamit 900 miliuuni koruuninik akisunerussasut.
Tassunga atatillugu aamma Asii Chemnitz Narup Kommune Kujallermi kommunalbestyrelse ataatsimeeqatigissavaa.
- Kommune Kujallermukarninni Asii Chemnitz Narup-ip ilagissavaanga. Qulaajaaneq pillugu suleqatigiin nitsituut peqatigeqqissavaanga. Tassanngaanniit iluarsisassat iluarsaanniarlugit suleruluttariaqarpugut, ilami aalajangiisoqarnissaa Qaqortumi, Narsarsuarmi allanilumi amerlaqisut utaqqikatappaat. Utaqqikatannerallumi paasilluarsinnaavarput, Naaja Nathanielsen oqarpoq.