Island: Aasaanerani arfanniarneq tamarmi taamaatiinnarneqartoq
Islandimi naalakkersuisut aasaanerani arfanniarnissaq inerteqqutigaat. Arfanniarneq pingasunngorpat aallartittussaagaluarpoq. Islandimiut tusagassiorfiat, RUV taama allaaserisaqarpoq.
Islandimi aalisarnermut sullissivik Islandimilu inuussutissaqarnermut oqartussaasut Islandip uumasunut atugassartitaasut pillugit inatsimmi piumasaqaataasut malillugit islandip imartaani arfanniartoqartarsimannginnerata nalunaarusiarereeraallu taama aalajangertoqarpoq.
Nalunaarusiami siorna arfattat 148-t malinnaavigineqarput. Taakkunannga 36-t toqunnginneranni arlaleriarlugit aallaaneqarsimapput.
Ataasiakkaat sisamanit tallimariarlugit aallaaneqarput, ataaserlu unaartaqarluni akunnerni tallimani iluatsinngitsumik malersorneqarluni. Pissutsit Islandimi Inuussutissaqarnermut oqartussaasut pisortaata ”akuernaarneqarsinnaanngitsutut inatsisinillu malinninngitsututut” taavai.
Nalunaarusiaq maajimi saqqummersinneqarpoq. Tassanilu Islandimi inuussutissaqarnermut ministerip, Svandís Svavarsdóttirip arfanniarnerup taamaatinneqarnissaanut inatsisitigut tunngavissaqartoqannginnerarpaa.
Maannali Islandimi uumasut atugarissaarnissaannut siunnersuisoqatigiit arfanniarnermik isornartorsiuingaatsiarnikuupput.
Tamannalu pissutigalugu inuussutissaqarnermut ministerip arfanniarnissaq ullumikkumit aggustip naanissaata tungaanut taamaatiinnarpaa.
