Savalimmiuni aarluarsuit 1400-nit amerlanerusut toqorarneqartut

Aarluarsuit 1400-it Savalimmiuni toqorarneqarnerat avatangiisinut illersuiniaqatigiiffinnit sakkortuumik isornartorsiorneqarpoq.

Aarluarsuit 1400-nit amerlanerusut kangerlummi Skálafjordimi sapaammi unnukkut toqorarneqarsimasut, Savalimmiuni radioqarfiullunilu TV-qarfiusup Kringvarp Føroyap nalunaarutigaa. Aarluarsunnik taama amerlatigisunik toqoraaneq Savalimmiuni ileqqut malillugit toqoraasarnermut tunngatillugu oqallittoqalerpoq.

Nutaarsiassaqartitsivik dpa marlunngornermi taama allappoq.

Taamannalu amerlatigisunik toqoraaneq Savalimmiuni aarfanniartarnermut peqatigiiffimmi ilaasortaasup nuimasuuptamanna ingasagisimallugu KVF-imut oqaatigaa.

- Qanoq piniartoqarsinnaatigissanersoq pimoorussilluta eqqartortariaqalerparput, dpa-mut oqaatigineqarsimasutut allaaserineqarpoq, tassanilu peqatigiiffimmi ilaasortaasimasup aqqa ilanngunneqarsimanngilaq.

Imaq aagasattuinnaq

Kangerluup imartaa aaginnaasumik aarluarsuillu 1428-it angutinit sissamukartinneqariarlutik toqorarneqartunik videoliamik avatangiisinut illersuiniaqatigiiffik, Sea Shepherd, inuit attaveqatigiittarfianut Facebookimut saqqummiussisimavoq.

Savalimmiuni aarluarsunnik aatsaat taama amerlatigisunik toqoraasoqartoq, avatangiisinut illersuiniaqatigiiffik oqarpoq.

- Aarluarsuk uumasuuvoq kusanartoq, alutorineqartussaq - sissamut aagasattumut uniagassaanngitsoq, inuit attaveqatigiittarfiani Facebookimi isorinnittut ilaat allappoq.

- Piniarneq taamaattoq isumassaqanngilaq, uumasunullu naalliutsitsinerulluni. Piniarneqartartut sipporlugit pisoqarmat killissamik qaangiisoqarpoq, illersuiniaqatigiiffik, OceanCare, taama isornartorsiuivoq.

Aarluarsuit 1400-t toqunneqartut

Savalimmiuni aarluarsunniartarneq vikinngilli nalaanni pisarpoq.

Aarluarsuit ungoorneqarlutik kangerliumanerni kangerlunniluunniit toqorarneqartarput, neqaalu toqoraaqataasunit agguarneqartarluni.

Ukioq 2020 kisitsisoqarmat, aarluarsuit 611-it toqorarneqarput.

Taamaattumillu aarluarsuit 1428-it toqorarneqarnerat amerlavallaarneragaapput.